Serikali ya Türkiye imepanga kuweka sheria mpya za kudhibiti matumizi ya mitandao ya kijamii kwa vijana ili kuzuia athari za uraibu wa mitandao hiyo. Waziri wa Uchukuzi wa Türkiye, Abdulkadir Uraloğlu, alitangaza tarehe 7 Februari kupitia matangazo ya TRT Haber kuwa sheria hiyo itaanza kutekelezwa mwaka huu kwa kuwazuia watoto wenye umri wa chini ya miaka 16 kutumia mitandao ya kijamii.
"Türkiye ni moja ya mataifa matano duniani yanayotumia mitandao ya kijamii kwa kiwango cha juu," alisema Uraloğlu. "Tunapaswa kuwalinda watoto na vijana dhidi ya hatari zinazotokana na matumizi ya kupindukia ya mitandao hii."
Mpango huo unalenga kuweka vizuizi vya matumizi kwa mujibu wa makundi ya umri, ambapo watoto walio chini ya miaka 13 na wale walio kati ya miaka 13 hadi 16 watawekewa vikwazo tofauti vya matumizi ya mitandao ya kijamii.
Rais wa Türkiye, Recep Tayyip Erdoğan, alielezea wasiwasi wake kuhusu uraibu wa skrini (screen addiction) wakati wa hotuba yake tarehe 3 Februari. "Kudhibiti janga hili la uraibu wa skrini ni kipaumbele cha juu kwa serikali," alisema. "Tunapitia hatua mbalimbali za kuweka udhibiti mkali kwenye majukwaa ya mitandao ya kijamii, ikiwemo kuweka vikwazo vya umri wa watumiaji."
Rais Erdoğan aliongeza: "Hatupaswi kuwaacha watoto wetu wakipotea katika mchanganyiko wa kidijitali. Hatuwezi kufumbia macho hali ya vijana kuathirika kisaikolojia kwa kisingizio cha uhuru."
Hatua kama hizi za kudhibiti matumizi ya mitandao ya kijamii kwa vijana zimekuwa zikiongezeka katika mataifa mbalimbali duniani.
Mwezi Novemba mwaka jana, Australia ilipitisha sheria inayozuia kabisa vijana walio chini ya miaka 16 kutumia mitandao ya kijamii, isipokuwa kwa majukwaa yenye matumizi ya kielimu au ubunifu kama YouTube na WhatsApp.
Norway inazingatia kuongeza umri wa chini wa kutumia mitandao ya kijamii kutoka miaka 13 hadi 15, huku Ufaransa ikipitisha sheria inayohitaji ruhusa ya wazazi kwa watoto wa chini ya miaka 15 kujiunga na mitandao ya kijamii.
Mataifa mengine kama Indonesia na Uingereza pia yanafanya tathmini ya kuanzisha kanuni za aina hii ili kulinda watoto na vijana dhidi ya athari za mitandao ya kijamii.