Serikali ya Marekani inakabiliwa na hatari ya kufungwa (shutdown) kuanzia Oktoba Mosi, baada ya Rais Donald Trump kukataa kufanya mazungumzo na viongozi wa chama cha Democratic kuhusu kuongeza muda wa bajeti ya serikali. Tofauti na ilivyozoeleka ambapo makubaliano hufikiwa dakika za mwisho, safari hii pande zote mbili hazina hata dalili ya mazungumzo, jambo linalozua hofu ya mkwamo huu kuwa mrefu na wenye madhara makubwa.
Wachumi na wachambuzi wa masuala ya fedha, wakiongozwa na gazeti la New York Times, wameonya kuwa kufungwa kwa serikali wakati huu kunaweza kuwa pigo kubwa litakalouzamisha uchumi wa nchi hiyo, ambao tayari unayumba. Uchumi wa Marekani tayari unakabiliwa na changamoto za mfumuko wa bei unaochochewa na ushuru wa forodha uliowekwa na Trump, pamoja na soko la ajira lililodorora kutokana na sera kali za uhamiaji na kufukuzwa kwa wafanyakazi wengi wa serikali.
Mark Zandi, mchumi mkuu katika taasisi ya Moody's Analytics, alisema, "Uchumi uko katika hali dhaifu sana. Kama ungekuwa imara, 'shutdown' ndefu isingeudhuru sana, lakini sasa hivi, inaweza kuwa sababu ya kuuporomosha kabisa."
Kufungwa kwa serikali kutasababisha mamilioni ya watumishi wa umma, wakiwemo wanajeshi, kukosa mishahara yao. Ingawa watalipwa mishahara yao ya nyuma pindi mkwamo utakapoisha, mateso watakayopitia katika kipindi hicho yatakuwa makubwa. Huduma muhimu kwa jamii pia zitaathirika; hifadhi za taifa na makumbusho zitafungwa, ukaguzi wa usalama wa chakula utasitishwa, na mikopo kwa biashara ndogo itasimama.
Hofu kubwa mwaka huu ni kwa programu ya serikali ya kusaidia wanawake na watoto wachanga kutoka familia za kipato cha chini (WIC), ambayo inatarajiwa kuishiwa fedha za kupokea maombi mapya kuanzia Oktoba Mosi.
Kwa kawaida, kila 'shutdown' inapunguza Pato la Taifa (GDP) kwa takriban asilimia 0.1 kwa kila robo mwaka. Mkwamo wa wiki tano wakati wa urais wa kwanza wa Trump (2018-2019) ulipunguza GDP kwa kiasi kidogo, lakini uchumi wakati huo ulikuwa imara na uliweza kupata nafuu haraka. Hata hivyo, wachumi wanasema hali ya sasa ni tofauti, kwani uchumi unapoteza kasi.
Gregory Daco, mchumi kutoka kampuni ya EY-Parthenon, alisisitiza, "Hivi sasa ni wakati ambapo uchumi wetu unapoteza nguvu." Wengine wanaonya kuwa mkwamo mrefu unaweza kutikisa masoko ya fedha na kuongeza wasiwasi wa wawekezaji kuhusu utulivu wa kisiasa na kiuchumi wa Marekani.