Mvutano mkali wa kisiasa kuhusu bajeti ya serikali nchini Marekani umechukua sura mpya na ya kutisha, baada ya Ikulu ya White House chini ya Rais Donald Trump kuanza kutafakari hatua ambayo haijawahi kuchukuliwa: kutowalipa mishahara yao watumishi wa umma watakaosimamishwa kazi iwapo serikali itafungwa (shutdown).
Hii ni hatua inayoonekana kama mkakati wa kuongeza shinikizo kwa Chama cha Democratic, huku maisha ya maelfu ya watumishi wa serikali yakitumika kama chambo. Kwa kawaida, hata serikali ikifungwa na watumishi wasio wa idara muhimu kulazimika kukaa nyumbani bila kazi, wamekuwa wakilipwa mishahara yao yote pindi mzozo unapomalizika na serikali kufunguliwa.
Akizungumza na waandishi wa habari tarehe 7 Oktoba, Rais Trump alipoulizwa kama atahakikisha watumishi hao wanalipwa, alitoa jibu la kuweka mashaka. "Inategemea unazungumzia nani," alisema Trump, akiongeza kuwa, "Watu wengi wako hatarini kwa sababu ya Wademocrat." Alidokeza kuwa ingawa serikali yake itawajali watu, "kuna wengine ambao hawastahili kujaliwa" na watatendewa tofauti.
Kauli hii inaonekana kuthibitisha ripoti kutoka chombo cha habari cha Axios, ambacho kilifichua kuwa Ikulu ya White House inatafuta tafsiri mpya ya kisheria. Tafsiri hiyo inasema malipo ya mishahara ya nyuma kwa watumishi waliosimamishwa kazi si jambo la lazima, isipokuwa kama Bunge la Congress litaidhinisha waziwazi. Hii inamaanisha kuwa takriban watumishi 750,000 wanaweza kupoteza mishahara yao kwa kipindi chote ambacho serikali itakuwa imefungwa.
Mkakati huu ni ongezeko la presha ikilinganishwa na vitisho vya awali vya kuwaachisha kazi watumishi hao. Kwa kuweka rehani mishahara yao, utawala wa Trump unatumai kuwalazimisha Wademocrat wakubaliane na matakwa yake ya kibajeti. Alipoulizwa kwa nini watumishi hao wasilipwe, Rais Trump alijibu kwa ukali, "Waulizeni Wademocrat swali hilo."
Hata hivyo, mpango huu umepokea ukosoaji mkali, hata kutoka ndani ya chama chake cha Republican. Seneta Tom Tillis, Mrepublican kutoka North Carolina, aliita mkakati huo "mbaya" na "ujumbe wa kutisha" kwa watu ambao wamekuwa "mateka" katika mzozo wa kisiasa kati ya Ikulu na Wademocrat.