Serikali ya Marekani imeingia katika wiki yake ya pili ya "shutdown" – hali ya kusitisha shughuli zake za umma – baada ya Bunge la Seneti kushindwa tena kupitisha bajeti ya muda, na kuwaacha mamilioni ya Wamarekani katika sintofahamu. Mkwamo huu wa kisiasa unachochewa na mzozo mkali kuhusu mustakabali wa mfumo wa bima ya afya maarufu kama 'Obamacare'.
Mgogoro ulianza rasmi Oktoba Mosi, siku ya kwanza ya mwaka mpya wa fedha wa 2026, baada ya Bunge kushindwa kuidhinisha bajeti. Kiini cha tatizo ni madai ya Chama cha Democratic kwamba ni lazima kuwe na hakikisho la kuendelea kutolewa kwa ruzuku za bima ya afya chini ya sheria ya 'Obamacare' kabla ya kuidhinisha bajeti yoyote. Kwa upande wao, Chama cha Republican kinasisitiza kuwa serikali ifunguliwe kwanza, kisha masuala ya bima ya afya yajadiliwe baadaye.
Rais Donald Trump, ingawa amesema anazungumza na Wademokrat, ameendelea kuukosoa mfumo huo akidai ni mbovu na unapoteza mabilioni ya dola. "Obamacare ni mfumo ulioharibika. Tunataka kuwapa watu wetu huduma bora za afya, na siyo kutoa pesa kwa wageni wanaoingia nchini," alisema Trump, akidokeza kuwa anaweza kukubaliana na mpango mpya.
Hata hivyo, Wademokrat wamekanusha vikali madai kwamba fedha za Obamacare zinawafaidi wahamiaji wasio na nyaraka, wakisema sheria za sasa zinazuia hilo waziwazi.
Wakati wanasiasa wakivutana, adha kubwa inawaangukia wananchi wa kawaida. Takriban watumishi wa umma 800,000 wamelazimishwa kwenda likizo bila malipo. Wafanyakazi muhimu kama vile waongozaji wa ndege na maajenti wa FBI wanafanya kazi bila mishahara. Hali hii imeleta usumbufu mkubwa, ikiwemo foleni ndefu katika viwanja vya ndege na ucheleweshaji wa safari.
Athari za mkwamo huu zimesambaa kote nchini. Hifadhi za taifa na makumbusho zimefungwa, na huduma muhimu za kijamii kama vile mpango wa lishe kwa akina mama na watoto wachanga (WIC) ziko hatarini kusitishwa.
Huu ni mkwamo mkubwa wa kwanza tangu ule wa mwaka 2018-2019, ambao ulidumu kwa siku 35 na unasadikiwa kugharimu uchumi wa Marekani hasara ya takriban dola bilioni 3 (sawa na takriban Shilingi Trilioni 7.5 za Kitanzania).