Hali ya kisiasa katika nchi jirani ya Kenya imezidi kuwa tete, huku Rais William Ruto akionekana kubadili gia na kuachana na wito wake wa awali wa mazungumzo na utulivu. Badala yake, ametoa onyo kali na la wazi kwa wale wote anaowatuhumu kwa kupanga njama za kuiangusha serikali yake kabla ya uchaguzi mkuu ujao.
Akizungumza bila kumung'unya maneno leo, Alhamisi, Julai 10, 2025, wakati wa hafla ya uzinduzi wa Mradi wa Makazi kwa ajili ya maafisa wa polisi eneo la Kilimani, Nairobi, Rais Ruto alituma ujumbe mzito kwa wapinzani wake wa kisiasa pamoja na kundi la vijana, hasa wa kizazi cha 'Gen Z', ambao wamekuwa mstari wa mbele katika wimbi la maandamano nchi nzima.
Katika hotuba yake iliyojaa ukakamavu, Rais Ruto alidai kuwa amepata taarifa za kuwepo kwa viongozi aliowaita "waliokata tamaa" wanaopanga njama za kutumia ghasia na maandamano ili kumng'oa madarakani kinyume na katiba. Alisema wanasiasa hao hawataki kusubiri sanduku la kura ifikapo mwaka 2027.
"Nimesikia wakisema hawatasubiri uchaguzi wa 2027. Eti wanataka kuzua fujo, kuchoma mali za watu, na kuleta machafuko ili waipindue serikali. Sasa nataka niwaambie waziwazi, wajaribu!" Rais Ruto alisema kwa sauti ya changamoto.
Aliongeza kwa msisitizo, "Watajua kuwa hawajui! Jaribuni! Hii ni nchi ya kidemokrasia inayoongozwa kwa sheria."
Matamshi haya ya Rais Ruto yanakuja wakati Kenya ikishuhudia maandamano makubwa na ya kihistoria yanayoongozwa na vijana. Maandamano hayo yalianza kama kupinga Mswada wa Fedha lakini sasa yamepanuka na kuwa kilio cha jumla dhidi ya uongozi mbovu, hali ngumu ya maisha, na vitendo vya ukatili vinavyodaiwa kufanywa na jeshi la polisi. Hatua hii ya Ruto ya kuacha lugha ya upatanishi na kutumia kauli za onyo kali inaashiria uwezekano wa kuongezeka kwa mivutano ya kisiasa katika siku zijazo nchini humo.