Hofu imetanda tena katika Jamhuri ya Kidemokrasia ya Kongo (DRC) baada ya serikali kuthibitisha rasmi kuanza kwa mlipuko mpya wa ugonjwa hatari wa Ebola. Huu ni mlipuko wa 16 kuwahi kuikumba nchi hiyo, ambayo imekuwa ikipambana na ugonjwa huu kwa miongo kadhaa.
Waziri wa Afya wa DRC, Roger Kamba, alitangaza hali hiyo ya hatari wakati akizungumza na waandishi wa habari katika mji mkuu, Kinshasa. Alieleza kuwa chanzo cha mlipuko huu mpya kimebainika katika jimbo la kusini la Kasai, ambapo mwanamke mjamzito mwenye umri wa miaka 34 alithibitishwa kuwa na virusi vya Ebola baada ya kulazwa hospitalini akiwa na dalili za homa kali na kutapika mfululizo.
Taarifa kutoka wizara ya afya inaeleza kuwa hali ni mbaya zaidi, kwani hadi sasa kuna jumla ya visa 28 vinavyoshukiwa kuwa vya Ebola, na kati ya hivyo, vifo 15 tayari vimeripotiwa. Hii inazua wasiwasi mkubwa wa uwezekano wa kusambaa kwa kasi kwa ugonjwa huo hatari.
Ebola ni ugonjwa wa homa kali ya kutoka damu unaosababishwa na virusi. Ugonjwa huu ulipata jina lake kutokana na Mto Ebola nchini DRC, ambapo uligunduliwa kwa mara ya kwanza mwaka 1976. Huu ni ugonjwa wa kuambukiza sana kupitia majimaji ya mwili kama vile damu, matapishi, au jasho la mtu aliyeathirika. Bila matibabu ya haraka na stahiki, kiwango cha vifo kinaweza kufikia asilimia 80 hadi 90, na kuufanya kuwa miongoni mwa magonjwa ya kuogopwa zaidi duniani.
Historia inaonyesha jinsi Ebola inavyoweza kuwa janga. Kati ya mwaka 2013 na 2016, mlipuko mkubwa uliotokea Afrika Magharibi ulisababisha vifo vya watu takriban 11,300. Kwa DRC, vita dhidi ya Ebola imekuwa ni ya kudumu; nchi hii imewahi kutangaza kumalizika kwa milipuko 15 huko nyuma, na sasa inakabiliana na changamoto hii kwa mara nyingine tena.