Ulimwengu wa soka umegubikwa na simanzi na mshtuko mkubwa kufuatia taarifa za kifo cha mshambuliaji wa Liverpool na timu ya taifa ya Ureno, Diogo Jota, aliyefariki dunia akiwa na umri wa miaka 29. Kifo chake kimetokana na ajali mbaya ya gari iliyotokea nchini Uhispania.
Kwa mujibu wa taarifa kutoka vyombo vya habari vya kimataifa kama vile 'Marca' la Uhispania, ajali hiyo ya kutisha ilitokea kwenye barabara kuu ya A-52 katika eneo la Zamora, magharibi mwa Uhispania, usiku wa manane. Taarifa za kina kutoka chombo cha habari cha 'rtve' zinaeleza kuwa gari alimokuwa akisafiria Jota lilitoka nje ya barabara na kupinduka kabla ya kuwaka moto. Watoa huduma za dharura walifika eneo la tukio, lakini hawakuweza kuokoa maisha yake.
Msiba huu umeongezeka uzito maradufu kwani imethibitishwa kuwa Jota alikuwa ameambatana na mdogo wake, André, ambaye naye amefariki dunia katika ajali hiyo. André naye alikuwa mchezaji wa kulipwa, akicheza katika ligi daraja la pili nchini Ureno.
Janga hili la ghafla limekuja wiki mbili tu baada ya Diogo Jota kufunga ndoa na mpenzi wake wa muda mrefu, Rute Cardoso, katika sherehe iliyofanyika nchini kwao Ureno. Wawili hao walikuwa tayari wamejaliwa watoto watatu. Hivyo, ameacha mke na familia changa katika majonzi mazito.
Kifo cha Jota ni pigo kubwa kwa klabu ya Liverpool na ulimwengu wa soka. Akiwa katika kilele cha ubora wake, Jota alikuwa mchezaji muhimu katika safu ya ushambuliaji ya Liverpool, akishindana namba na nyota wengine kama Mohamed Salah, Cody Gakpo, Luis Díaz, na Darwin Núñez. Katika msimu uliopita wa 2024-2025, alicheza jumla ya mechi 37 na kufunga mabao 9 na kutoa asisti 4 katika mashindano yote.
Katika maisha yake ya soka, Jota alicheza jumla ya mechi 398 za kulipwa katika klabu za Paços de Ferreira, FC Porto, Wolverhampton, na Liverpool, akifunga mabao 136. Kwa timu ya taifa ya Ureno, alicheza mechi 49 na kufunga mabao 14. Ulimwengu unamkumbuka kama mshambuliaji hodari, mwenye bidii na aliyekuwa na uwezo wa kubadilisha mchezo wakati wowote.