Taarifa mpya muhimu zimeibuka kutoka kwa uchunguzi wa polisi nchini Uhispania kuhusu ajali mbaya ya gari iliyosababisha kifo cha mshambuliaji wa Liverpool, Diogo Jota. Ripoti za awali zinaonyesha kuwa Jota mwenyewe ndiye anayesadikiwa kuwa dereva wa gari hilo na kwamba mwendo kasi uliopitiliza huenda ndicho chanzo kikuu cha ajali hiyo ya kutisha.
Kwa mujibu wa taarifa zilizochapishwa na kituo cha habari cha Sky Sports, polisi wa Uhispania wamesema kuwa ushahidi wote uliokusanywa hadi sasa unaelekeza kuwa Jota ndiye aliyekuwa akiendesha gari lake aina ya Lamborghini wakati ajali ilipotokea.
Ajali hiyo ilitokea alfajiri ya Julai 3 katika barabara kuu karibu na eneo la Zamora, nchini Uhispania, na kusababisha vifo vya Jota na mdogo wake, André Silva. Taarifa za awali za polisi zilieleza kuwa tairi la gari lilipasuka, na kusababisha gari kutoka nje ya barabara na kuwaka moto.
Ripoti mpya za polisi sasa zinaongeza kuwa gari hilo linaaminika kuwa lilikuwa likienda kwa "kasi iliyozidi sana kiwango kinachoruhusiwa" katika barabara hiyo kuu. Ingawa baadhi ya watu walidokeza kuwa huenda hali ya barabara ilikuwa mbaya, polisi wamekanusha hilo, wakisema eneo hilo si eneo hatari kwa ajali na barabara ilikuwa katika hali nzuri.
Mtaalamu wa usalama barabarani, Javier López Delgado, alinukuliwa akisema, "Alama za breki za gari (skid marks) zinaonyesha wazi kuwa lilikuwa likienda kwa kasi ya juu sana. Kama angekuwa anaendesha kwa mwendo wa kawaida, huenda wasingefariki."
Taarifa hizi mpya zinaongeza uchungu zaidi kwenye msiba huu, ikizingatiwa kuwa Jota alilazimika kusafiri kwa gari badala ya ndege kurejea Liverpool kutokana na ushauri wa daktari baada ya kufanyiwa upasuaji mdogo kwenye mapafu. Alikuwa katika safari ndefu kutoka Ureno kuelekea Santander, Uhispania, ili apande meli (feri) kwenda Uingereza, kabla ya kuendelea na safari ya gari hadi Liverpool. Uchunguzi kamili bado unaendelea.