Mshambuliaji wa Liverpool, Luis Díaz, hatimaye amejitokeza kutoa heshima zake za mwisho kwa aliyekuwa mchezaji mwenzake, Diogo Jota, aliyeaga dunia, lakini amechelewa. Siku saba baada ya kifo cha Jota, Díaz alihudhuria misa maalum ya kumkumbuka, huku akionekana kumwaga machozi, japo kitendo hicho hakijafaulu kuzima dhoruba ya lawama inayomkabili kwa kususia mazishi na badala yake kuonekana akisherehekea.
Jumatano iliyopita, kanisa la Gondomar nchini Ureno lilifurika waombolezaji katika misa ya "siku ya saba" kumkumbuka Jota na mdogo wake, André Silva, waliofariki katika ajali mbaya ya gari nchini Uhispania Julai 3. Díaz, aliyekuwa amekosolewa vikali kwa kutohudhuria mazishi, alikuwa miongoni mwa waliofika, akionekana mwenye huzuni kubwa, tofauti kabisa na picha zake zilizosambaa mitandaoni.
Siku ya mazishi ya Jota, Díaz alionekana kwenye video nchini kwao Colombia akicheza na kufurahi katika sherehe ya mwanablogu maarufu. Kitendo hiki kilizua ghadhabu kubwa, hasa mashabiki walipokumbuka undugu wa kipekee uliokuwepo kati yake na Jota. Wengi wamekiona kitendo hicho kama usaliti.
Inakumbukwa Jota alimsaidia sana Díaz alipowasili kwa mara ya kwanza FC Porto, akimpa nyumba yake aishi bila malipo. Mwaka 2023, baba yake Díaz alipotekwa nyara, Jota alionesha upendo wa dhati kwa kushangilia goli huku akiinua juu jezi ya Díaz namba 7, kama ishara ya kumfariji na kuombea baba yake apatikane salama.
Lawama ziliongezeka zaidi kwa kuwa Díaz alikuwa na muda wa kutosha kusafiri kwenda Ureno, kwani Liverpool ilikuwa imefuta mazoezi ya kujiandaa na msimu mpya ili kutoa heshima kwa Jota. Kitendo chake cha kwenda kwenye sherehe badala ya mazishi kilionekana kama dharau na ukosefu wa ubinadamu.
Mwenendo wa Díaz ulikuwa kinyume kabisa na ule wa klabu ya Liverpool. Klabu iliamua kustaafisha jezi namba 20 ya Jota, ikiwa ni mara ya kwanza katika historia yake kufanya hivyo. Zaidi ya hapo, Liverpool ilitangaza kuilipa familia ya Jota mshahara wote wa miaka miwili ya mkataba wake uliokuwa umebaki, kiasi cha Pauni milioni 14.6 (takriban Shilingi bilioni 49.6 za Kitanzania). Wachezaji wengi wa Liverpool, kama Virgil van Dijk na Andy Robertson, walisafiri umbali mrefu kuhudhuria mazishi.
Licha ya kujitokeza kwenye misa na kuonyesha majuto, Díaz hajazungumzia lolote kuhusu utata huo. Wakati huohuo, bado kuna taarifa kuwa anashinikiza kuondoka Liverpool majira haya ya joto, akitaka nyongeza ya mshahara au auzwe, huku klabu za Barcelona na Bayern Munich zikimtaka.