Mshambuliaji wa Liverpool na timu ya taifa ya Colombia, Luis Díaz, amejikuta katikati ya dhoruba ya hasira na shutuma kali kutoka kwa mashabiki na vyombo vya habari duniani kote. Sababu ni kitendo chake cha kutohudhuria mazishi ya mchezaji mwenzake, Diogo Jota, na badala yake kuonekana akifurahi na kucheza densi kwenye hafla ya watu mashuhuri nchini mwake.
Wakati ulimwengu wa soka ukiwa umeungana katika maombolezo ya kumpoteza Diogo Jota na mdogo wake, André Silva, waliofariki katika ajali mbaya ya gari, mazishi yao yalifanyika Julai 6 katika mji wao wa Gondomar, Ureno. Wachezaji wengi, wakiwemo wa Liverpool, timu ya taifa ya Ureno na klabu nyingine, walisafiri kutoka kote duniani, wengine wakitokea moja kwa moja Marekani baada ya Kombe la Vilabu, ili kutoa heshima zao za mwisho.
Hata hivyo, kutokuwepo kwa Luis Díaz, ambaye amekuwa na Jota kwa miaka mitatu na nusu Liverpool, kulizua maswali. Maswali hayo yaligeuka kuwa ghadhabu wakati video iliposambaa kwenye mitandao ya kijamii ikimwonyesha Díaz akitabasamu na kucheza densi na mshawishi maarufu wa mitandao ya kijamii (influencer) huko Barranquilla, Colombia. Kibaya zaidi, video hiyo ilisambazwa wakati uleule mazishi ya Jota yalipokuwa yakiendelea.
Kitendo hiki kimechukuliwa kama dharau kubwa na ukosefu wa huruma. Vyombo vya habari kutoka Uhispania, Venezuela, Mexico na hata nchini kwao Colombia vimeungana kumkosoa vikali. Mashabiki wa Liverpool wameonyesha hasira yao mitandaoni, huku wengi wakidai kuwa mchezaji huyo anapaswa kuondoka klabuni. "Luis Díaz lazima aondoke," ni kauli inayosambaa miongoni mwa mashabiki.
Deni la Fadhila Lisilolipwa
Hasira za mashabiki zimechochewa zaidi na historia kati ya wachezaji hawa wawili. Wengi wanakumbuka mwaka 2023, wakati baba yake Luis Díaz alipotekwa nyara na familia yake kuwa katika wakati mgumu sana. Katika kipindi hicho, Diogo Jota alikuwa mmoja wa watu walioonyesha upendo na kumuunga mkono hadharani, ambapo alishangilia goli kwa kunyanyua juu jezi ya Díaz yenye namba 7. Kitendo hicho cha Jota kilipongezwa sana. Sasa, wengi wanamshutumu Díaz kwa kushindwa kurudisha fadhila hiyo ya huruma na undugu wakati wa msiba wa mwenzake.
Heshima za Liverpool kwa Jota
Wakati Díaz akikabiliwa na shutuma, klabu ya Liverpool imeonyesha heshima ya hali ya juu kwa marehemu. Klabu hiyo imetangaza kuistaafisha jezi namba 20 ya Jota—kitu ambacho hakijawahi kufanyika katika historia ya klabu—na pia wameamua kuilipa familia yake mshahara wote uliosalia kwenye mkataba wake, kiasi cha Pauni milioni 14.56 (zaidi ya Shilingi bilioni 50).
Imefahamika pia kuwa Jota alikuwa akisafiri kwa gari badala ya ndege kurejea Liverpool kwa ushauri wa daktari baada ya kufanyiwa upasuaji mdogo, na ndipo mauti yalipomkuta.