Kocha Mkuu wa timu ya taifa ya Uganda 'Cranes', Morley Byekwaso, ameimwagia sifa kemkem timu ya soka ya Tanzania, Taifa Stars, kufuatia ushindi wa bao 1-0 dhidi ya timu yake. Byekwaso ameiweka Stars katika orodha ya timu tishio kwenye fainali za Mataifa ya Afrika kwa Wachezaji wa Ndani (CHAN), zitakazofanyika kuanzia Agosti 2 nchini Kenya, Tanzania na Uganda.
Akizungumza mara baada ya mchezo wa kwanza wa michuano ya CECAFA 3 Nations, uliochezwa hivi karibuni kwenye Uwanja wa Black Rhino, Karatu mkoani Arusha, Kocha Byekwaso alikiri kuwa Stars ilionyesha kiwango cha juu sana. Alisema walisumbua sana wachezaji wake na anaamini watakuwa moja kati ya timu zinazopewa nafasi kubwa ya kufanya vizuri kwenye michuano hiyo mikubwa ya CHAN.
"Mchezo ulikuwa mgumu kwetu, lakini tumekipata kile tulichokihitaji. Tanzania walikuwa bora sana wakiwa na mpira, walitumia vyema upana wa uwanja na walionana vizuri. Hilo lilifanya kipindi cha kwanza kiwe kigumu sana kwetu kwa sababu wachezaji wetu wanne wa mbele hawakuweza kufanya vizuri. Hii ni kwa sababu Taifa Stars iko vizuri sana na inaweza kuwa tishio kwenye michuano ya CHAN," alisema Kocha Byekwaso. Aliongeza kuwa katika kipindi cha pili, walibadilisha mbinu na kuweza kuwanyima Stars nafasi ya kumiliki mpira kama ilivyokuwa awali.
Kwa upande wake, Kocha Mkuu wa Taifa Stars, Hemed Suleiman 'Morocco', alieleza kuwa mchezo huo ulikuwa wa kimkakati zaidi kuliko kutafuta matokeo. "Ilikuwa mechi ya kuangalia kama kile tulichoelekezana kwenye kambi yetu kipo sawa? Haikuwa mechi ya matokeo," alifafanua Morocco. Aliongeza kuwa walimiliki mpira kipindi cha kwanza na kutengeneza nafasi nyingi, na katika kipindi cha pili waliwaachia wapinzani wao mpira lakini walikuwa imara sana kwenye ulinzi. "Ninaamini kuna kitu tumekivuna kwenye mchezo huu kwani tumecheza na timu ambayo nayo inakwenda kucheza CHAN," alisema. Morocco alisisitiza kuwa katika siku chache zilizobaki kabla ya CHAN, wataendelea na mazoezi na hasa watatilia mkazo eneo la ushambuliaji ili kuboresha safu ya mbele.
Bao pekee la Stars katika mchezo huo lilifungwa na Idd Selemani 'Nado' katika dakika ya 14, bao ambalo lilidumu hadi filimbi ya mwisho. Michuano hii ya CECAFA 3 Nations imeandaliwa mahususi kwa ajili ya kuzipa mazoezi timu wenyeji wa fainali hizo za CHAN, ambazo ni Tanzania, Uganda na Kenya. Hata hivyo, Kenya imejitoa katika mashindano ya CHAN, huku Senegal ikiwa ni timu mwalikwa katika CECAFA 3 Nations. Taifa Stars inatarajiwa kurejea uwanjani Jumapili ijayo kukipiga na Senegal, ikiendelea na maandalizi yake kuelekea CHAN.