Kikosi cha timu ya taifa ya Tanzania, Taifa Stars, kimerejea nchini juzi kutoka kwenye kambi yake ya maandalizi nchini Misri, na sasa kiko tayari kwa kipimo cha mwisho kabla ya Fainali za Mataifa ya Afrika kwa Wachezaji wa Ndani (CHAN). Kesho, Jumanne, Stars itashuka dimbani kuvaana na timu mwalikwa ya Senegal katika mchezo wa ufunguzi wa michuano ya CECAFA 4 Nations utakaopigwa jijini Arusha.
Akizungumza baada ya timu kuwasili, Kocha Mkuu Hemed "Morocco" Suleiman, alisema kambi ya Ismailia, Misri, imekuwa na mafanikio makubwa na imekifanya kikosi kuwa tayari kwa asilimia 80 kwa ajili ya mashindano ya CHAN.
"Tuko vizuri kwa asilimia 80. Kambi ya Misri imetusaidia sana kimwili na kiufundi. Hizi asilimia 20 zilizobaki tutazikamilisha kwenye michezo hii mitatu ya CECAFA, ambayo itatuweka kwenye hali nzuri ya ushindani," alisema Morocco.
Michuano hiyo ya CECAFA, inayoanza leo kwa mchezo kati ya Kenya na Uganda, inalenga kuzipa timu wenyeji wa CHAN (Tanzania, Kenya, Uganda) mechi za majaribio za hali ya juu. Katika mabadiliko ya dakika za mwisho, Senegal imechukua nafasi ya Congo Brazzaville iliyokuwa imepangiwa awali kushiriki.
Kocha Morocco aliongeza kuwa kikosi chake kimejipanga kufanya vizuri kwenye CHAN mwaka huu, hasa kwa kuwa watakuwa wanacheza mbele ya mashabiki wa nyumbani. "Hatujawahi kufanya vizuri sana kwenye michuano hii, lakini sasa tumedhamiria. Kwa kikosi tulichonacho, ninaamini tutafikia malengo yetu," alisisitiza.
Baada ya kupambana na Senegal kesho katika Uwanja wa Karatu, Stars itarejea dimbani Julai 24 kucheza na Kenya, na kumaliza na Uganda, Julai 27. Baada ya hapo, wataelekeza nguvu zao zote kwenye mchezo wa ufunguzi wa CHAN dhidi ya Burkina Faso, utakaopigwa Agosti 2, kwenye Uwanja wa Benjamin Mkapa, Dar es Salaam.