Wakati timu ya taifa, Taifa Stars, ikitarajiwa kurejea nchini kesho kutoka kambi yake yenye mafanikio nchini Misri, kocha msaidizi Hemed Morocco amepiga kengele ya hatari kuhusu ratiba ya mashindano ya CECAFA, akisema inaweza kuwa "mtego" utakaowachosha wachezaji na kuiharibia timu kwenye Fainali za Mataifa ya Afrika kwa Wachezaji wa Ndani (CHAN).
Akizungumza kutoka Ismailia, Misri, Morocco alisema ingawa wanamaliza kambi wakiwa na kikosi kilicho fiti kimwili, ana wasiwasi mkubwa na muda ambao mashindano ya CECAFA yamepangwa kufanyika. Mashindano hayo, yanayoanza Jumatatu, Julai 21, yataifanya Stars kucheza mechi tatu za ushindani mkubwa ndani ya siku sita, na kumalizika Julai 27, siku tano tu kabla ya mchezo wao wa ufunguzi wa CHAN dhidi ya Burkina Faso, Agosti 2.
"Hii michuano ya CECAFA ni mizuri, lakini haikuja wakati sahihi. Ingetakiwa ifanyike wiki mbili zilizopita," alisema Morocco. "Tutacheza mechi tatu ngumu ndani ya siku chache, halafu tunakwenda kucheza mechi muhimu ya ufunguzi wa CHAN. Wachezaji watakuwa na uchovu (fatigue). Ratiba imetubana sana."
Licha ya wasiwasi huo, Morocco alithibitisha kuwa kambi ya Misri imekuwa na mafanikio makubwa katika kuwaandaa wachezaji. "Kile tulichokikusudia kimefanikiwa. Wachezaji wako fiti, wana nguvu na wana ari. Kambi imekuwa bora sana," aliongeza.
Katika michuano hiyo ya CECAFA 4 Nations, Taifa Stars itafungua dimba dhidi ya timu mwalikwa, Congo Brazaville, siku ya Jumatatu katika Uwanja wa Tanzanite, Babati. Baadaye, watapambana na wenyeji wenza wa CHAN, Kenya, Julai 24, na kumaliza na Uganda, Julai 27.
Sasa, jukumu la benchi la ufundi litakuwa ni kupanga jinsi ya kutumia michuano hiyo kupata maandalizi bila kuwachosha wachezaji muhimu, ili kuhakikisha wanakuwa katika hali bora zaidi kwa ajili ya vita ya kuwania taji la CHAN wakiwa nyumbani.