Klabu ya Simba imefungua ukurasa mpya kwa kumtangaza rasmi raia wa Bulgaria, Dimitar Nikolaev Pantev, kama meneja mkuu atakayekiongoza kikosi hicho. Pantev, ambaye ni mbadala wa Fadlu Davids, anawasili Msimbazi akiwa na ajenda mbili kuu: kurudisha mataji na kuwapa mashabiki burudani ya soka safi na la kuvutia.
Kinachofanya uteuzi wake kuwa wa kipekee ni kwamba, Pantev ndiye kocha ambaye timu yake ya zamani, Gaborone United ya Botswana, iliwasumbua Wekundu wa Msimbazi hivi karibuni. Licha ya Simba kusonga mbele, uwezo wa Gaborone kucheza soka la kisasa na la kupangilia uliwavutia mabosi wa Simba na kuwafanya waamini kuwa ndiye mtu sahihi wa kuwapa wanachokihitaji.
Akizungumza baada ya kutua nchini, Pantev amesema anaelewa presha iliyopo na kiu ya mafanikio ya mashabiki. "Nafahamu Simba haijawa na misimu mizuri kwa miaka miwili au mitatu iliyopita, lakini nimekuja hapa kubadilisha hilo. Shabaha yangu ya kwanza ni kuipeleka timu kwenye hatua ya makundi ya Ligi ya Mabingwa Afrika, na kisha kutawala ligi ya ndani na mashindano mengine," alisema kocha huyo.
Pantev anakuja Simba akiwa na wasifu wa kuvutia, akitoka kushinda mataji ya ligi mfululizo katika nchi mbili tofauti: aliipa ubingwa Victoria United ya Cameroon msimu wa 2023/24, na kabla ya hapo aliiongoza Gaborone United kutwaa ubingwa nchini Botswana.
Falsafa yake iko wazi; anataka timu icheze soka la burudani. "Sitaki tu kushinda, nataka tushinde huku tukicheza soka la kuvutia. Tukicheza soka la uhakika na kupendeza, matokeo ya ushindi yatakuja yenyewe. Simba ina wachezaji wazuri na wenye uwezo mkubwa, nina imani wataelewa na kutekeleza maelekezo yangu," aliongeza.
Alikiri kuwa anaifahamu Simba kwa undani, kwani alianza kuifuatilia tangu ilipokuwa Misri kwenye maandalizi ya msimu, hasa baada ya timu yake ya Gaborone kupangiwa kucheza nao. Pia, amechambua Ligi Kuu ya Tanzania na kubaini ushindani mkubwa kutoka kwa timu nne hadi tano, jambo linalomtaka ajipange haraka ili kuhakikisha Simba inakuwa imara.