Wizara ya Nishati nchini Tanzania imejitokeza na kusisitiza juhudi zake katika kuhakikisha usawa wa kijinsia unazingatiwa kikamilifu ndani ya taasisi zake. Mkurugenzi wa Ufuatiliaji na Tathmini wa wizara hiyo, Bi. Anita Ishengoma, amesema kuwa wizara imekuwa mstari wa mbele katika kutoa fursa sawa kwa wanawake katika kutekeleza majukumu mbalimbali ya kisekta.
Akizungumza kwa mnasaba wa kuelekea Maadhimisho ya Siku ya Wanawake Duniani, ambayo huadhimishwa kila mwaka tarehe 8 Machi na kwa mwaka huu maadhimisho ya kitaifa yanafanyika mkoani Arusha, Bi. Ishengoma alieleza bayana kuwa usawa wa kijinsia umekuwa moja ya vipaumbele muhimu ndani ya wizara ya nishati.
"Hapa wizarani, suala la usawa wa kijinsia linapewa umuhimu mkubwa. Hii inaonekana wazi kutokana na idadi ya wanawake ambao wameaminiwa na kuteuliwa kushika nafasi za juu za uongozi, ambapo kwa sasa tunao wanawake watano katika ngazi za maamuzi," alifafanua Bi. Ishengoma.
Aliongeza kuwa uwepo wa uwiano mzuri wa kijinsia ndani ya wizara umewezesha wanawake kushiriki kwa ukamilifu katika mchakato wa kufanya maamuzi muhimu yanayoathiri sekta ya nishati. Ushirikishwaji huu umekuwa na mchango mkubwa katika kuboresha utekelezaji wa majukumu ya kisekta na kuongeza ufanisi kwa ujumla.
Katika kuadhimisha Siku hii muhimu ya Wanawake Duniani, Bi. Ishengoma alisisitiza umuhimu wa wanawake kuendelea kuwa na hamasa na kujitokeza kwa wingi kuchangamkia fursa mbalimbali zinazopatikana. Alieleza kuwa kufanya hivyo kutasaidia katika kujenga usawa wa kijinsia ulio imara na kuwawezesha wanawake kushiriki kikamilifu katika maendeleo ya sekta mbalimbali za uchumi na jamii.