Katibu wa NEC, Itikadi, Uenezi na Mafunzo wa CCM, CPA Amos Makalla, ametoa ahadi muhimu kwa wakulima wa Tanzania wakati wa ziara yake ya siku 10 katika mikoa ya Lindi na Mtwara. Akiwa wilayani Liwale, alizungumza na wananchi na kueleza kuwa serikali na chama chake wamejizatiti kupambana na changamoto zinazowakabili wakulima, hasa katika vyama vya ushirika.
Makalla alifurahishwa na taarifa kutoka kwa Ofisa Ushirika wa Mkoa, ambazo zilionyesha juhudi za serikali katika kuwasaidia wakulima kupata bei nzuri za mazao yao na pembejeo. Alitoa mfano wa mafanikio yaliyopatikana katika zao la korosho, ambapo bei imepanda kwa kiasi kikubwa. "Mnashuhudia wenyewe jinsi bei ya korosho ilivyokuwa wakati wa kangomba na jinsi ilivyo sasa. Hatua hii ni kubwa sana," alisema.
Hata hivyo, alikiri kuwepo kwa changamoto ya wabadhirifu ndani ya vyama vya ushirika, ambao wamekuwa wakitumia vibaya rasilimali zinazokusudiwa kuwanufaisha wakulima. "Tunatambua kwamba kuna mchwa na wabadhirifu ndani ya vyama vya ushirika, na hawa ndio watu ambao tunapaswa kuwashughulikia," alisisitiza.
Makalla aliahidi kuwa serikali na CCM watahakikisha kuwa pembejeo zinazotolewa zinafika kwa wakulima wote, na siyo kunufaisha watu wachache. Aliongeza kuwa viongozi wa mikoa na wilaya, pamoja na CCM, wako macho kuhakikisha kuwa vyama vya ushirika vinaimarika na kuwasaidia wakulima kuboresha uchumi na maisha yao.
"Lengo letu ni kuhakikisha kuwa wananchi wetu, wakulima wetu, wanaimarika kupitia ushirika na kwamba mazao yao yana tija na yanawasaidia kuboresha uchumi na maisha yao," alieleza.
Alisisitiza kuwa mafanikio haya ndiyo yanayowafanya wananchi waendelee kuamini Chama cha Mapinduzi, na kwamba Rais Samia Suluhu Hassan ameweka rekodi ya kubadilisha maisha ya wakulima kwa kuongeza ruzuku ya pembejeo za mbegu na mbolea.
"CCM katika ilani yetu tumeongeza mipango yetu kuboresha ushirika, hao wengine hawana dhamana wala wajibu, wasikilizeni viongozi wenu," alihimiza.