Mwanasiasa mkongwe na mtetezi wa haki za wanawake, Bi. Gertrude Mongella, ametoa wito kwa wanawake wote nchini kumrudisha Rais Samia Suluhu Hassan madarakani katika uchaguzi mkuu ujao, ili aweze kukamilisha mipango na mikakati yake ya kuwainua wanawake kiuchumi na kijamii.
Akizungumza jijini Dar es Salaam katika maadhimisho ya miaka 30 ya Mkutano wa Beijing, Bi. Mongella alisema kuwa ni muhimu kwa wanawake kumpa Rais Samia nafasi ya kuendelea kuongoza, ili kuhakikisha kuwa ajenda za maendeleo ya wanawake zinakamilika. Alisisitiza kuwa wanawake wanapaswa kumdai Rais Samia ilani ya mpango kazi na utekelezaji wa maazimio ya Beijing.
"Ninajivunia sana kuona mafanikio ya Mkutano wa Beijing, hasa kwa kuwa tuna rais mwanamke. Wanawake tusipoliona hili kama fursa ya kipekee, tutakuwa tumepoteza bahati kubwa," alisema Bi. Mongella. Aliongeza, "Ninaomba Samia arudi madarakani ili kuimarisha ajenda yetu ya kuonyesha kuwa mwanamke anaweza. Hili nalisema si kwa sababu ya siasa, bali kwa uchungu ninao katika moyo wangu kuhusu maazimio ya Beijing."
Bi. Mongella alionya kuwa wanawake wasipomchagua Rais Samia, watakuwa wamevunja heshima ya maazimio ya Beijing. Alisema kuwa baada ya uchaguzi, wanawake wanapaswa kumdai Rais Samia kutekeleza ahadi zake, ikiwa ni pamoja na kuhakikisha kuwa kuna uwiano wa nusu kwa nusu katika uteuzi wa mawaziri na viongozi wengine wa serikali.
Pia, Bi. Mongella alisisitiza umuhimu wa nchi kuacha kuwa tegemezi na kujitegemea kwa kutumia rasilimali zake. Aliwataka wanawake kutumia elimu zao kuwa wabunifu na kuchangia katika maendeleo ya taifa. "Tunahitaji mkakati wa kuwawezesha watoto wa kike kutengeneza na kutumia teknolojia. Elimu ya watu wazima irudishwe, ili tuweze kujifunza TEHAMA. Dunia inaelekea huko, tunapaswa kujifunza akili mnemba," alieleza.
Kwa upande wake, Naibu Waziri wa Fedha, Bwana Hamad Chande, aliwataka wanawake kupendana, kupeana fursa, na kusimamia maadili katika kukabiliana na mabadiliko ya usasa. Alisema kuwa matunda ya Mkutano wa Beijing ni pamoja na kuongezeka kwa wanawake katika ngazi za maamuzi na mchango wao mkubwa katika sekta ya kilimo na sekta nyinginezo.
Bwana Chande aliwahimiza wanawake kutoa elimu kwa vijana katika maeneo ya vijijini, hasa wakati huu nchi inapoelekea uchaguzi mkuu, ili kuhakikisha kuwa amani ya nchi inalindwa.
Profesa Penina Mlama, kutoka Women Fund Tanzania-Trust, alisema kuwa Mkutano wa Beijing umeleta mabadiliko makubwa duniani, kwani serikali nyingi zimeingiza masuala ya usawa wa kijinsia katika sera zao. Alimpongeza Bi. Mongella kwa kuongoza mkutano huo kwa umakini na kufanikisha kupatikana kwa tamko moja lililoakisi matakwa ya wanawake duniani kote.