Katika mwendelezo wa ziara yake ya kikazi ya siku saba mkoani Morogoro, Katibu wa Halmashauri Kuu ya CCM Taifa (NEC) anayeshughulikia Itikadi, Uenezi na Mafunzo, CPA Amos Makalla, amefanya mkutano mkubwa wa hadhara na wananchi wa Ifakara, Wilayani Kilombero. Akizungumza na umati wa watu uliofurika kumsikiliza tarehe 8 Mei, 2025, CPA Makalla alijikita katika kusikiliza kwa makini na kutolea ufafanuzi changamoto mbalimbali za kimaendeleo zinazowakabili wananchi hao, huku akiahidi kuwa serikali ya Chama Cha Mapinduzi itachukua hatua za haraka kuzitafutia ufumbuzi.
Suala lililochukua uzito mkubwa na kuibua hisia za wengi ni kuhusu ujenzi wa Hospitali ya Halmashauri ya Mji wa Ifakara, yenye hadhi ya wilaya, ambayo inajengwa katika eneo la Kiberege. CPA Makalla, bila kumung'unya maneno, alisema bayana kuwa ujenzi wa hospitali hiyo muhimu kwa afya za wananchi umekwama na kusuasua kutokana na kuwepo kwa vitendo vya ubadhirifu wa fedha za umma zilizotengwa kwa ajili ya mradi huo. "Ndugu zangu wana Ifakara, nimepata taarifa za kusikitisha kuhusu mradi huu. Niwahakikishie, Waziri wa Nchi Ofisi ya Rais, Tawala za Mikoa na Serikali za Mitaa (TAMISEMI), atafika hapa Kiberege hivi karibuni. Atakuja binafsi kulifanyia kazi suala hili kwa kina, kuhakikisha hospitali hii inakamilika haraka iwezekanavyo na wote waliohusika na ubadhirifu huu wanakumbana na mkono wa sheria bila kuonewa muhali," alihakikisha Makalla huku akishangiliwa na wananchi.
Akijibu kero nyingine zilizowasilishwa na wananchi, kiongozi huyo wa CCM mwenye dhamana kubwa alisema tayari amewasiliana na Waziri wa Ujenzi kuhusu changamoto za miradi ya barabara wilayani humo. Alieleza kuwa amepata hakikisho kutoka kwa Waziri husika kuwa ujenzi na ukarabati wa barabara hizo utaendelea kama ilivyopangwa ili kurahisisha usafiri na usafirishaji. Vilevile, kuhusu kero ya upatikanaji wa maji safi na salama, CPA Makalla alisema, "Nimezungumza na Waziri wa Maji, ndugu yangu Jumaa Aweso. Ameniahidi kuwa mara baada ya Bunge la Bajeti kukamilika na kupitisha bajeti ya wizara yake, atafanya ziara maalum hapa Kilombero kuja kushughulikia na kutatua changamoto za maji moja kwa moja na wananchi."
CPA Makalla pia aligusia changamoto zinazoukabili Mfumo wa Stakabadhi Ghalani, ambao ni muhimu kwa kuwawezesha wakulima kupata bei nzuri ya mazao yao na kupata mikopo kupitia benki. "Mfumo huu wa stakabadhi ghalani ni mzuri sana na ni mkombozi kwa mkulima. Nimetoka Lindi na Mtwara ambako wakulima wamefaidika nao mno. Hata hivyo, nimepata taarifa kuwa hapa Kilombero, kwa halmashauri zenu zote mbili, vituo vya kupokelea mazao ni vichache na wakati mwingine malipo kwa wakulima yanachelewa. Mheshimiwa Mkuu wa Mkoa, hili tumelisikia, naomba kwa kushirikiana na viongozi wengine muongeze vituo hivi na tuhakikishe wakulima wanalipwa kwa wakati ili waendelee kuwa na imani na mfumo huu," alielekeza Makalla.
Akihitimisha hotuba yake iliyokuwa imejikita katika kutatua kero, CPA Makalla aliwahakikishia wananchi kuwa Chama Cha Mapinduzi (CCM) hakikimbii changamoto bali kinakabiliana nazo uso kwa uso ili kuleta maendeleo endelevu kwa Watanzania wote. "Changamoto mlizonazo ni za kwetu sote na CCM ndicho chama chenye dhamana na uwezo wa kuzitatua. Msidanganywe na wale wasiokuwa na dhamana ya uongozi; hakuna chama mbadala chenye sera wala uwezo wa kuwaletea maendeleo ya kweli zaidi ya CCM," alisisitiza kiongozi huyo.