Katibu wa NEC, Itikadi, Uenezi na Mafunzo wa Chama Cha Mapinduzi (CCM), CPA Amos Makalla, amewataka wananchi wa Buchosa kutomlaumu mbunge wao, Erick Shigongo, kwa kuchelewa kukamilika kwa ujenzi wa barabara ya Sengerema-Buchosa, iliyopo katika Halmashauri ya Buchosa, wilayani Sengerema, mkoani Mwanza.
Makalla alieleza kuwa sababu kuu ya kuchelewa kukamilika kwa barabara hiyo, yenye urefu wa takribani kilomita 53 na inayojengwa kwa kiwango cha lami, ni kutokana na utendaji mbovu wa mkandarasi aliyekuwa ameajiriwa awali. Alisema kuwa kazi ya mkandarasi huyo haikuridhisha, ndiyo maana aliondolewa na taratibu za kumpata mkandarasi mwingine zimekamilika.
Akizungumza na wananchi katika Halmashauri ya Buchosa, wilayani humo, mnamo Mei 21, 2025, Makalla, ambaye yuko katika ziara ya kikazi ya siku saba katika mikoa ya Kagera, Geita, Mwanza, Simiyu, na Shinyanga, alisema anafahamu vizuri kuhusu barabara hiyo tangu alipokuwa Mkuu wa Mkoa wa Mwanza.
"Barabara ya Sengerema-Buchosa, naomba Erick asihukumiwe nayo. Ninaijua vizuri. Nilikuwa Mkuu wa Mkoa huu, na nimeshiriki katika uamuzi wa kuondoa mkandarasi baada ya kuzingua. Nilisema mkandarasi afutwe kazi ili wizara tupate mwingine," alisema Makalla.
Aliongeza, "Ninajua ni mambo ya kisheria, na hatimaye ameondoka. Ninajua Waziri Mkuu alikuwa hapa, na Waziri baada ya kupatikana mkandarasi mwingine, barabara itamalizika."
Makalla alisema ameamua kueleza ukweli ili suala hilo lisiwe fimbo ya kuwachapia wanasiasa wengine. "Tulifanya uamuzi mgumu kwa maslahi ya wananchi wa Buchosa ili barabara isiharibiwe," alisema.
Hii inaonyesha kuwa serikali inachukua hatua za kuhakikisha miradi ya maendeleo inakamilika kwa wakati na kwa ubora unaotakiwa, na inalinda maslahi ya wananchi.