Katika kile kinachoonekana kuwa msimamo mkali zaidi dhidi ya biashara haramu ya dawa za kulevya nchini, Mamlaka ya Kudhibiti na Kupambana na Dawa za Kulevya (DCEA) imetangaza kuwa iko tayari kupendekeza kurejeshwa kwa adhabu ya kifo kwa wasafirishaji na walanguzi wakuu wa "unga". Hata hivyo, sambamba na tishio hilo, mamlaka imefungua mlango wa msamaha kwa wale wote watakaojisalimisha na kutubu kwa hiari yao.
Akizungumza jijini Dar es Salaam, Kamishna Jenerali wa DCEA, Aretas Lyimo, alitoa fursa ya kipekee kwa wahusika wa biashara hiyo. "Yeyote anayejihusisha na biashara hii, popote alipo, afike ofisi zetu au apige simu namba 119. Tuko tayari kuwasamehe na hawatachukuliwa hatua za kisheria iwapo watajisalimisha na kuwaomba radhi Watanzania kwa madhara waliyosababisha," alisema Lyimo, akionya kuwa msako mkali unaendelea kwa wale waliojificha ndani na nje ya nchi.
Msimamo huu mkali unakuja wakati mamlaka hiyo imeteketeza shehena kubwa ya dawa za kulevya zenye uzito wa jumla ya kilogramu 4,402.02. Zoezi hili la kuangamiza shetani huyo lilifanyika katika kiwanda cha Saruji cha Twiga, Wazo jijini Dar es Salaam. Miongoni mwa dawa zilizochomwa ni pamoja na kiasi kikubwa cha methamphetamine (kilo 2,168.18), heroin (kilo 1,064.29), bangi (kilo 515.48), mirungi (kilo 653.74) na kiasi kidogo cha cocaine.
Kamishna Lyimo alifafanua kuwa dawa hizi zilikuwa ni vielelezo katika kesi mbalimbali mahakamani. Baadhi ya kesi hizo zimekamilika na wahusika wamehukumiwa vifungo vikali, vikiwemo vya maisha jela kwa watu kama Hassan Azizi na Hemed Juma 'Hororo', huku wengine wakipata vifungo vya miongo kadhaa. Kwa kesi zinazoendelea, mahakama ilitoa idhini ya kuteketeza vielelezo hivyo kwa mujibu wa Sheria ya Kudhibiti Dawa za Kulevya ya mwaka 2015, ili kuzuia hatari ya kuharibika au kutumika vibaya. Shehena iliyoteketezwa inajumuisha dawa kutoka kesi kubwa kama ile ya Najim Abdallah Mohamed, iliyohusisha peke yake zaidi ya kilo 3,000 za heroin na methamphetamine.