Mamlaka ya Kudhibiti na Kupambana na Dawa za Kulevya (DCEA) imefanikiwa kukamata pembe ya ndovu, risasi 11 za moto na dawa za kulevya katika operesheni maalum iliyofanyika mkoani Arusha. Kamishna Jenerali wa DCEA, Aretas Lyimo, amesema kuwa operesheni hiyo ni sehemu ya juhudi za mamlaka hiyo katika kukabiliana na uhalifu unaohusiana na biashara haramu ya dawa za kulevya.
Katika tukio jingine lililoripotiwa mkoani humo, mtu mmoja alikamatwa kwa kupanda miche ya bangi ndani ya nyumba yake kwa kutumia glasi za plastiki zinazotumika mara moja (disposable). Kamishna Lyimo ameweka wazi kuwa biashara ya dawa za kulevya mara nyingi ina uhusiano wa karibu na uhalifu mwingine, kama vile usafirishaji haramu wa silaha na bidhaa za wanyamapori.
Kwa mujibu wa takwimu za DCEA, katika kipindi cha Januari hadi Februari 2025, mamlaka hiyo ilikamata kiasi kikubwa cha dawa za kulevya katika mkoa wa Arusha, ikiwa ni pamoja na kilogramu 98.55 za bangi, kilogramu 162.111 za mirungi, gramu 301 za heroin na gramu 195 za dawa zingine haramu.
DCEA imeendelea kuhimiza ushirikiano wa wananchi katika mapambano dhidi ya biashara ya dawa za kulevya na uhalifu unaoambatana nayo, ikisisitiza kuwa juhudi za pamoja ndizo zitakazosaidia kufanikisha vita dhidi ya uhalifu huu.