Katika kile kinachoonekana kama "kuramba matapishi" kibiashara ili kusalia kwenye ushindani, kampuni ya Meta (wamiliki wa Facebook, Instagram, na WhatsApp) imefanya mabadiliko makubwa ya kimkakati. Baada ya miaka kadhaa ya kupunguza maudhui ya habari na kugoma kulipa vyombo vya habari, Meta sasa imetangaza kuingia mikataba minono ya kibiashara na mashirika makubwa ya habari Marekani na Ulaya ili kuboresha roboti yake ya 'Meta AI'.
Hatua hii, iliyoripotiwa na Reuters tarehe 5 Desemba, inalenga kuifanya Meta AI kuwa mshindani wa kweli dhidi ya Google Search na ChatGPT ya OpenAI katika kutoa taarifa za wakati (Real-time information).
Orodha ya Vigogo Waliosainiwa
Meta haikuenda kinyonge, imesaini mikataba ya leseni ya maudhui na "majitu" ya habari duniani, yakiwemo:
- CNN
- Fox News na Fox Sports
- USA Today
- People
- Le Monde (Ufaransa)
- Daily Caller na Washington Examiner
Ingawa thamani ya mikataba hii imefanywa siri, lengo liko wazi: Mtumiaji wa Meta AI sasa akiuliza swali kuhusu tukio linaloendelea muda huu, atapata majibu sahihi yakiambatana na viungo (links) vya habari kutoka kwa vyanzo hivi vinavyoaminika.
Kwanini Meta Imebadili Msimamo?
Hii ni "U-Turn" ya kushangaza. Itakumbukwa kuwa mwaka 2024, Meta ilifunga 'News Tab' (Kichupo cha Habari) kwenye Facebook na mwaka 2022 iliacha kulipa vyombo vya habari, ikidai kuwa watumiaji wake hawataki siasa na habari.
Lakini mambo yamebadilika kutokana na sababu kuu mbili:
- Tishio la ChatGPT na Google: OpenAI hivi karibuni ilikiri kuwa SearchGPT inachukua asilimia 10 ya shughuli zote za utafutaji mtandaoni na inakua kwa kasi. Google nayo imeunganisha AI kwenye utafutaji (Search). Meta imegundua kuwa bila habari za wakati (Current Events), roboti yake ya 'Meta AI' itaonekana "zuzu" au iliyopitwa na wakati.
- Kuboresha 'Llama': Ili mfumo wao wa AI (Llama models) uwe na akili, unahitaji kulishwa data mpya na sahihi kila siku. Mikataba hii inawapa uhalali wa kutumia data za mashirika hayo kufundisha mitambo yao bila kuingia matatani kisheria.
Faida kwa Watumiaji (Hata wa WhatsApp)
Meta AI inapatikana katika nchi zaidi ya 200 kupitia Facebook, Instagram, WhatsApp, na Messenger. Hii inamaanisha kuwa hivi karibuni, mtumiaji wa WhatsApp hapa Tanzania akiuliza "Nani ameshinda mechi ya leo?" au "Kuna habari gani mpya duniani?", atapata majibu ya uhakika kutoka vyanzo kama Reuters au CNN papo hapo, badala ya kupewa majibu ya zamani.
Vyombo vya habari kama USA Today na People vimepokea hatua hii kwa mikono miwili, vikiamini itawasaidia kufikia wasomaji wapya ambao wamehama kutoka kusoma magazeti na sasa wanashinda kwenye mitandao ya kijamii na Chatbots.
Vita ya 'AI Search'
Huu ni ushahidi kuwa vita ya teknolojia sasa imehamia kwenye "AI Search." Kampuni haziishii tu kutengeneza roboti zinazoongea, zinataka roboti hizo ziwe ndiyo njia kuu ya watu kupata taarifa duniani, zikichukua nafasi ya 'Google Search' tuliyoizoea. Meta imesisitiza kuwa itaendelea kusaka wabia zaidi wa habari ili kuhakikisha inatoa taarifa zilizoshiba na zenye mizani (balanced news).