Kampuni ya teknolojia ya OpenAI, watengenezaji wa roboti-soga maarufu duniani, ChatGPT, iko mbioni kuleta mapinduzi makubwa katika jinsi tunavyofanya manunuzi mtandaoni. Kwa mujibu wa ripoti kutoka gazeti la Financial Times, OpenAI inatengeneza mfumo wa malipo utakaounganishwa moja kwa moja ndani ya ChatGPT, hatua itakayokibadilisha kutoka kuwa msaidizi wa habari na kuwa soko kamili la kidijitali.
Mpango huu unalenga kuunda chanzo kipya cha mapato kwa kampuni hiyo. Badala ya kutegemea tu ada za usajili kutoka kwa watumiaji wa huduma zake za kulipia (premium), OpenAI sasa itaweza kupata kamisheni kutokana na mauzo ya bidhaa yatakayofanyika kupitia jukwaa lake. Hii ina maana kuwa mamilioni ya watu wanaotumia ChatGPT bure hivi karibuni wataweza kununua bidhaa moja kwa moja bila kuondoka kwenye mazungumzo na roboti-soga huyo.
Mfumo huu utakapokamilika, mtumiaji ataweza kuuliza swali kuhusu bidhaa, kupata pendekezo, na kukamilisha malipo yote ndani ya ChatGPT. Kwa upande mwingine, wauzaji watakaotumia jukwaa hili kuuza bidhaa zao watalipa OpenAI kiasi fulani cha fedha kama kamisheni kwa kila mauzo. Hii ni sawa na jinsi masoko mengine ya mtandaoni yanavyofanya kazi.
Hatua hii inakuja baada ya OpenAI kutangaza ushirikiano na kampuni kubwa ya biashara mtandaoni, Shopify, mwezi Aprili. Ushirikiano huo uliwezesha ChatGPT kutoa mapendekezo bora ya bidhaa na kuonesha maoni ya wateja, kisha kumwelekeza mtumiaji kwenye duka la mtandaoni kupitia kiunganishi (link). Sasa, badala ya kumwelekeza mtumiaji nje, lengo ni kufanya biashara yote ifanyikie humo humo. Ripoti zinaeleza kuwa matoleo ya awali ya mfumo huu wa malipo tayari yanajadiliwa na washirika kama Shopify kuhusu mgawanyo wa mapato.
Wataalamu wa teknolojia wanaona hatua hii kama tishio kubwa kwa kampuni kubwa kama Google. Hii ni kwa sababu watu wengi zaidi wanaweza kuanza kutumia ChatGPT kutafuta mapendekezo ya bidhaa badala ya kutumia mtambo wa utafutaji wa Google.
Licha ya mapato ya OpenAI kuongezeka kwa kasi kubwa, kutoka dola bilioni 5.5 (kama trilioni 14.3 za Kitanzania) mwezi Desemba mwaka jana hadi dola bilioni 10 (kama trilioni 26 za Kitanzania) mwezi Juni mwaka huu, kampuni bado inapata hasara kubwa. Mwaka jana pekee, ilipata hasara ya dola bilioni 5 (kama trilioni 13 za Kitanzania) kutokana na gharama kubwa za kuendeleza na kuendesha mifumo yake ya akili bandia. Hivyo, kuingia kwenye biashara ya kamisheni ni hatua muhimu ya kimkakati ili kujiimarisha kifedha.