Kuna habari kubwa ambayo itawafurahisha wafanyabiashara na wahasibu, na wakati huo huo kuwatia hofu wale wanaoogopa teknolojia kuchukua kazi zao. Kampuni ya OpenAI, wababe walio nyuma ya mfumo maarufu wa ChatGPT, imeamua kuingia rasmi kwenye sekta ya fedha kwa kishindo. Hii ni baada ya kutangaza "ndoa ya kibiashara" na kampuni kubwa ya programu za uhasibu na kodi ya Marekani, Intuit.
Katika makubaliano hayo yaliyotangazwa Novemba 18, OpenAI imetia saini mkataba wa miaka mingi wenye thamani ya hadi Dola za Kimarekani milioni 100 (sawa na takriban Shilingi za Kitanzania Bilioni 265). Lengo la dili hili ni kuunganisha akili ya ChatGPT na data za kifedha za watumiaji milioni 100 wa Intuit ili kuunda "Mhasibu wa AI" (AI Agent) anayeweza kufanya kazi ngumu za kifedha.
Kutoka Kuchati hadi Kukokotoa Kodi
Kwa wale wasioifahamu Intuit, hii ndiyo kampuni inayomiliki programu maarufu duniani kama QuickBooks (inayotumiwa na makampuni mengi hata hapa Tanzania kutunza hesabu), TurboTax (ya kukokotoa kodi), Credit Karma, na Mailchimp.
Kupitia ushirikiano huu, programu hizi sasa zitaweza kutumika moja kwa moja ndani ya ChatGPT. Fikiria wewe ni mfanyabiashara Kariakoo unayetumia QuickBooks; badala ya kufungua kompyuta na kuanza kuhangaika na majedwali, utaweza kuichatisha ChatGPT na kuiuliza: "Je, mtiririko wangu wa pesa (cash flow) ukoje mwezi huu ukilinganisha na mwezi uliopita?" au "Nifanyie makadirio ya kodi ninayodaiwa." AI itachakata data zako na kukupa jibu kamili na ushauri, kama vile mhasibu msomi angefanya.
Hii ni hatua kubwa sana ya kimapinduzi. Inabadilisha ChatGPT kutoka kuwa "rafiki wa kupiga naye soga" na kuwa "mshauri mkuu wa kifedha" anayeweza kuchambua hesabu, kuandaa ripoti za kodi, na kujibu maswali magumu ya kiuhasibu kwa sekunde.
Usalama wa Pesa Zako
Suala la kuunganisha AI na data za pesa lazima lizue hofu ya usalama. Intuit wameliona hilo na wamesisitiza kuwa mfumo huu utatumia njia ya 'Opt-in'. Hii ina maana kuwa AI haitaingia kwenye akaunti zako kiholela; ni lazima wewe mtumiaji utoe idhini maalum. Wameahidi kuwa wataendelea kudhibiti data zote za wateja ili kulinda faragha, wakijua fika kuwa siri za fedha ni nyeti kama siri za kambi ya jeshi.
Fidji Simo, kiongozi wa matumizi ya OpenAI, amesema lengo lao ni kuwasaidia watu "kufanya maamuzi ya busara zaidi kifedha." Naye Mkurugenzi wa Intuit, Sasan Goodarzi, anaamini muunganiko huu utafungua milango mipya ya ukuaji wa biashara.
Kwanini OpenAI Inafanya Hivi Sasa?
Jibu ni rahisi: Pesa. OpenAI ina mpango kabambe wa kuwekeza kiasi cha kutisha cha Dola Trilioni 1.4 (zaidi ya TZS Trilioni 3,700) katika miundombinu ya kompyuta ndani ya miaka nane ijayo. Ili kupata fedha hizo, lazima wapanue wigo wa biashara zao. Hawawezi kutegemea watu wanaolipia ChatGPT ya kawaida pekee.
Hivyo, wameamua kugeukia makampuni makubwa (B2B). Tayari wameshaingia ubia na makampuni mengine kama Spotify (muziki), Expedia (usafiri), na Figma (ubunifu). Mkurugenzi wao Mkuu, Sam Altman, ametamba kuwa mapato yao ya mwaka huu yanatarajiwa kuvuka Dola bilioni 20 (TZS Trilioni 53), na wanategemea kufikia mamia ya mabilioni ifikapo mwaka 2030.
Kwa wafanyabiashara wa Tanzania, huu ni mwanga wa nini kinakuja. Siku si nyingi, huenda tukaanza kuona mifumo inayounganishwa na TRA au benki zetu za ndani ikitumia AI kukusaidia kupanga bajeti au kulipa kodi bila maumivu ya kichwa.