Nchini Taiwan, kashfa kubwa ya ujasusi wa viwandani imetikisa kampuni ya TSMC, ambayo ni kinara na mzalishaji mkuu zaidi duniani wa semi-conductor (chipu), 'bongo' zinazotumika katika vifaa vingi vya kielektroniki kama simu janja na kompyuta. Waendesha mashtaka nchini humo wamewafikisha mahakamani wahandisi watatu, wakiwemo wa sasa na wa zamani wa kampuni hiyo, kwa tuhuma nzito za kuvujisha siri za teknolojia ya hali ya juu ya utengenezaji chipu inayojulikana kama "2-nanometer (2nm)".
Tuhuma hizi zinachukuliwa kwa uzito mkubwa kwani zinahusu teknolojia ambayo bado haijaingia sokoni na inatajwa kuwa mustakabali wa vifaa vya kielektroniki vyenye kasi na nguvu zaidi. Kwa mujibu wa taarifa kutoka vyombo vya habari vya Taiwan, Ofisi ya Mashtaka ya Haki Miliki Bunifu imewashtaki watuhumiwa hao chini ya Sheria ya Usalama wa Taifa, ikionyesha jinsi suala hili linavyotazamwa kama tishio kwa usalama na uchumi wa taifa.
Waendesha mashtaka wamependekeza adhabu kali kwa watuhumiwa hao, wakitaka mhandisi mmoja afungwe jela miaka 14, wa pili miaka 9, na wa tatu miaka 7. Hii inaonyesha uzito wa kosa la kuiba na kusambaza taarifa zinazochukuliwa kuwa "teknolojia muhimu ya kitaifa" ambayo ni uti wa mgongo wa sekta ya viwanda vya Taiwan. "Kesi hii inahusu teknolojia muhimu ambayo ni tegemeo la viwanda vyetu na inahatarisha ushindani wa taifa letu katika soko la kimataifa," ilieleza taarifa ya ofisi ya mashtaka.
Miongoni mwa washtakiwa ni pamoja na mhandisi mmoja wa zamani wa TSMC ambaye baada ya kuacha kazi alijiunga na kampuni tanzu ya Tokyo Electron nchini Taiwan, kampuni maarufu ya Kijapani inayohusika na vifaa vya utengenezaji wa chipu. Kufuatia kufichuka kwa kashfa hii, kampuni ya Tokyo Electron ilithibitisha kumfukuza kazi mfanyakazi huyo mara moja baada ya kubainika kuhusika kwake.
Kwa upande wake, kampuni ya TSMC imekuwa na kauli fupi. Ingawa haikutoa maoni yake moja kwa moja kuhusu mashtaka haya mapya, hapo awali ilikuwa imetoa taarifa ikikiri kuchukua "hatua kali za kinidhamu" dhidi ya wafanyakazi waliohusika katika "uwezekano wa uvujishaji wa siri za kibiashara." Kitendo cha serikali kuingilia kati kinaashiria kuwa suala hili ni kubwa kuliko uhalifu wa kawaida wa kampuni, likiwa na sura ya usalama wa taifa.