Kupanga safari, iwe ni ya kwenda mapumzikoni Zanzibar, kibiashara Kariakoo kwenda Guangzhou, au hata kutembelea ndugu mikoani, imekuwa ikichosha sana. Unalazimika kufungua tovuti kumi tofauti: moja ya kukata tiketi ya ndege, nyingine ya kutafuta hoteli, nyingine ya kuangalia ramani (Google Maps), na nyingine ya kusoma maoni ya wateja. Ni vurugu tupu. Lakini sasa, kampuni ya Google imeamua kumaliza kero hii kwa kugeuza injini yake ya utafutaji kuwa "Wakala wa Safari" anayeendeshwa na Akili Mnemba (AI).
Katika tangazo lake la hivi karibuni la tarehe 17 Novemba, Google imefanya maboresho makubwa kwenye mfumo wake wa 'Search' kwa kuongeza uwezo mpya wa AI unaolenga kurahisisha maisha ya wasafiri duniani kote, ikiwemo sisi hapa Tanzania.
Tiketi za Ndege kwa Bei Chee (Flight Deals)
Kipengele cha kwanza kikubwa ni upanuzi wa huduma ya ‘Flight Deals’. Hapo awali, huduma hii ilikuwa inapatikana Marekani na nchi chache, lakini sasa Google imeiachia rasmi katika nchi na maeneo zaidi ya 200 duniani. Hii ina maana kwamba Mtanzania anayetaka kusafiri anaweza kutumia lugha nyepesi kabisa kutafuta nafuu ya bei.
Badala ya kuhangaika na mawakala, unaweza kuiandikia Google: "Nitafutie tiketi ya bei nafuu kwenda Dubai mwezi ujao kwa ajili ya familia ya watu watatu." AI ya Google itachimba mtandaoni, kulinganisha mashirika yote ya ndege yanayotua Julius Nyerere (JNIA) au KIA, na kukuletea machaguo bora zaidi yenye punguzo la bei. Huduma hii sasa inasaidia zaidi ya lugha 60, hivyo ni rahisi zaidi kutumia.
'Canvas': Mpangaji wa Ratiba Yako
Hapa ndipo penye utamu zaidi. Google imeanzisha kifaa kipya kinachoitwa ‘Canvas’ ndani ya mfumo wake wa 'AI Mode'. Zamani, 'Canvas' ilitumika kupanga dondoo za masomo au kazi, lakini sasa imebadilishwa kuwa 'shajara ya safari'.
Fikiria unataka kwenda kutalii Serengeti au kwenda mapumzikoni Afrika Kusini. Unaiambia AI aina ya safari unayotaka, kisha unabonyeza kitufe cha "Create with Canvas" (Tengeneza na Canvas). AI itakutengenezea ukurasa maalum unaoonekana kama ubao wa matangazo.
Kwenye ukurasa huu, AI itakusanyia kila kitu mahali pamoja:
- Tiketi za Ndege: Itakuwekea bei na muda wa safari.
- Hoteli: Itapendekeza hoteli zinazoendana na bajeti yako, ikikuonyesha picha na bei.
- Ramani na Maoni: Itakuonyesha eneo hilo kwenye Google Maps na maoni ya watu waliowahi kufika hapo.
- Vitu vya Kufanya: Itapendekeza migahawa au sehemu za utalii.
Uzuri ni kwamba unaweza kuhoji AI hii kama unavyomuuliza rafiki. Kwa mfano, unaweza kuuliza: "Je, hii hoteli iko karibu na migahawa inayopika vyakula vya asili?" au "Ni ipi yenye njia nzuri za kutembea kwa miguu (hiking)?" AI itachambua data za ramani na kukupa jibu sahihi papo hapo.
AI Kama 'Sekretari' wa Kuweka Nafasi
Google haijaishia hapo. Wameboresha uwezo wa 'Agent' (Wakala) wao. Ingawa kwa sasa huduma hii imeanza kwa nguvu nchini Marekani, lengo ni kuisambaza duniani. Huduma hii inakuwezesha kuiagiza AI ikufanyie 'booking' ya migahawa au matukio.
Badala ya kupiga simu mgahawani, unaiambia Google: "Niwekee nafasi ya chakula cha jioni kwa watu watano, saa mbili usiku, kwenye mgahawa wa vyakula vya baharini Masaki." AI itatafuta migahawa, kuangalia nafasi, na kukukatia 'booking' hiyo bila wewe kugusa simu kuongea na mtu. Mpango wa baadaye ni kuruhusu AI hii imalize kabisa mchakato wa kulipia tiketi za ndege na hoteli kwa niaba yako.
Google Yakataa Kushindwa
Mkakati huu wa Google ni jibu la moja kwa moja kwa ushindani mkali unaokuja kutoka kwa kampuni nyingine za AI zinazotishia biashara yake ya utafutaji (Search). Kwa kuweka vifaa hivi vyote—ndege, hoteli, ramani, na manunuzi—sehemu moja, Google inataka kuhakikisha kuwa mtumiaji hatoki nje ya mfumo wao kwenda kwingine.
Hii inakuja wiki chache tu baada ya Google kuboresha huduma zake za AI Shopping (Manunuzi), ikiruhusu watu kuuliza maswali magumu kuhusu bidhaa wanazotaka kununua. Kwa jumla, teknolojia inazidi kusogea karibu zaidi na matumizi yetu ya kila siku, ikifanya kazi ya kupanga safari ambayo zamani ilichukua wiki, sasa ichukue dakika chache tu.