Serikali ya Singapori imetangaza hatua kali na za kihistoria katika vita vyake dhidi ya sigara za kielektroniki, maarufu kama 'vapes', ikilenga kutoa adhabu kali zaidi ikiwemo kifungo cha hadi mwaka mmoja jela kwa wanaokiuka sheria. Mabadiliko haya yanakuja baada ya kutambua kuwa faini pekee haitoshi kudhibiti matumizi na usambazaji wa bidhaa hizi ambazo zimeanza kuchukua sura ya tatizo la kiafya na kimaadili.
Waziri Mkuu wa Singapori, Lawrence Wong, amesisitiza kuwa serikali inabadilisha mkakati wake na sasa inalichukulia suala la sigara za kielektroniki kama tatizo la dawa za kulevya. Kauli hii inaashiria mabadiliko makubwa katika msimamo wa serikali, ambayo awali ilikuwa ikishughulikia suala hili kwa adhabu ndogo ndogo kama faini. Hali imebadilika hasa baada ya mamlaka kugundua kuwa sehemu kubwa ya sigara hizi zilizokamatwa zimechanganywa na dawa zenye madhara makubwa.
Uchunguzi uliofanywa na mamlaka ya afya nchini humo umegundua kuwa takriban theluthi moja ya sigara za kielektroniki zilizokamatwa zilikuwa na kemikali iitwayo etomidate. Kemikali hii, ingawa hutumika hospitalini kama dawa ya kutuliza maumivu au usingizi kabla ya upasuaji, matumizi yake yasiyodhibitiwa nje ya mazingira ya kitabibu yanaweza kusababisha madhara makubwa kiafya, ikiwemo kuona vitu visivyokuwepo (hallucination) na hata kuharibu kabisa utendaji wa viungo vya mwili.
Kutokana na hatari hii, Singapori inafanya juhudi kubwa kuweka etomidate katika orodha ya dawa haramu chini ya Sheria ya Matumizi Mabaya ya Dawa za Kulevya. Iwapo uainishaji huu utapitishwa, mtu yeyote atakayepatikana na sigara ya kielektroniki yenye kemikali hiyo atachukuliwa kuwa ametumia dawa za kulevya, na atahukumiwa adhabu kali sawa na waraibu wa dawa kama kokeini. Hukumu hizi ni pamoja na kuingia katika mpango wa lazima wa kurekebisha tabia, na kwa waraibu wa mara kwa mara, wanaweza kuhukumiwa kifungo kisichopungua mwaka mmoja jela.
Mbali na adhabu kali, serikali ya Singapori imetangaza kuwa itatoa huduma za urekebishaji kwa wale walioathirika na uraibu wa sigara za kielektroniki. Hii inaonyesha mbinu ya pande mbili; kuzuia na kuadhibu kwa upande mmoja, na kusaidia walioathirika kwa upande mwingine. Hatua hii inaweza kuwa somo kwa nchi nyingine, ikiwemo Tanzania, ambapo matumizi ya sigara hizi yanaongezeka kwa kasi, hasa miongoni mwa vijana. Ni muhimu kwa mamlaka zetu kuangalia kwa karibu athari za bidhaa hizi na kuchukua hatua stahiki kabla ya tatizo hili kuwa janga kubwa la kitaifa.