Mahakama ya Marekani imeondoa kizuizi cha muda kilichokuwa kinazuia mpango wa utawala wa Donald Trump wa kuvunja Shirika la Maendeleo ya Kimataifa la Marekani (USAID), hatua ambayo inaweza kuathiri kwa kiwango kikubwa misaada ya kimataifa. Jaji Carl Nichols wa Mahakama ya Wilaya ya Washington D.C. aliamua mnamo Februari 21 kuondoa amri ya awali iliyokuwa inazuia mpango wa Trump wa kuwafuta kazi maelfu ya wafanyakazi wa USAID na kurekebisha muundo wa shirika hilo.
Hapo awali, mnamo Februari 7, serikali ya Trump ilitangaza mpango wa kuwaweka wafanyakazi 2,200 wa USAID kwenye likizo ya kulipwa na kuwarejesha nchini Marekani wale waliokuwa wakihudumu nje ya nchi ndani ya mwezi mmoja. Hata hivyo, mahakama ilikuwa imezuia mpango huo kwa muda.
Jaji Nichols alieleza kuwa chama cha wafanyakazi kilichowasilisha kesi hiyo hakikuweza kuthibitisha uwezekano wa "madhara yasiyoweza kurekebishwa" iwapo mpango wa serikali ungefanyika. "Kulinganisha hoja za pande zote mbili ni sawa na kulinganisha tufaha na chungwa," alisema, akisisitiza kuwa mahakama haiwezi kutoa hukumu kwa misingi ya maoni ya kisera.
Hata hivyo, alionyesha wasiwasi kuhusu wafanyakazi wa USAID walioko katika maeneo hatarishi ambao walipangiwa kufutwa kazi bila kuwa na njia za dharura za mawasiliano. Licha ya hayo, alikubali maelezo ya serikali kwamba wafanyakazi hao wangepata ulinzi wa kutosha kupitia mifumo ya mawasiliano rasmi. Jaji Nichols aliteuliwa na Trump mwaka 2019 wakati wa muhula wake wa kwanza.
Utawala wa Trump umekuwa ukipunguza bajeti ya misaada ya kimataifa kwa lengo la kupunguza matumizi ya serikali. Mpango wake wa kufuta USAID unahusisha kupunguza wafanyakazi kutoka 10,000 hadi 290 tu, hasa wale wa sekta ya afya na misaada ya kibinadamu, huku shughuli za shirika hilo zikihamishiwa chini ya Wizara ya Mambo ya Nje ya Marekani.
Hatua hiyo imepingwa vikali na vyama vya wafanyakazi, kama vile Shirikisho la Wafanyakazi wa Serikali ya Shirikisho (AFGE), ambao wanadai kuwa Trump hana mamlaka ya kuvunja shirika lililoanzishwa kisheria na Bunge la Marekani. Wamewasilisha kesi wakidai urejeshaji wa bajeti, kuanza upya kwa shughuli za USAID, na kuzuia hatua zaidi za kuvunja taasisi hiyo.
USAID, iliyoanzishwa mwaka 1961 na Rais John F. Kennedy, ni mojawapo ya mashirika makubwa zaidi ya misaada duniani, ikiwa na bajeti ya kila mwaka ya dola bilioni 42.8 (takriban shilingi trilioni 150 za Tanzania). Shirika hilo lilianzishwa kwa lengo la kusaidia maendeleo ya nchi zinazoendelea na kupunguza ushawishi wa Kisovieti wakati wa Vita Baridi.