Huko nchini Japani, mamlaka za afya zinafanya uchunguzi wa kina baada ya kugundua bakteria aina ya Legionella kwa kiwango cha juu sana katika moja ya bafu maarufu za maji moto (onsen) iliyoko katika Mkoa wa Tottori.
Kulingana na taarifa kutoka shirika la habari la Asahi Shimbun na kituo cha televisheni cha NHK cha Japani, manispaa ya Yonago inayomiliki bafu hilo la ‘Yodoe Yume Onsen’ na kampuni ya usimamizi iitwayo ‘Hakuho’ wamelazimika kusitisha huduma baada ya kugunduliwa kwa bakteria hao hatari.
Hatua hii ilichukuliwa baada ya mamlaka za afya za Mkoa wa Tottori kubaini mnamo tarehe 26 Aprili mwaka huu kuwa mmoja wa wateja wa bafu hilo alikuwa amegundulika kuwa na maambukizi ya ugonjwa unaosababishwa na bakteria hao, unaojulikana kama Legionellosis.
Kufuatia tukio hilo, mkoa ulifanya uchunguzi wa ubora wa maji katika bafu hilo na kupokea majibu ya awali mnamo tarehe 13 Mei yaliyodokeza uwepo wa bakteria wa Legionella. Siku hiyo hiyo, kesi ya pili ya maambukizi iliripotiwa, na kusababisha bafu hilo kufungwa kwa muda.
Uchunguzi zaidi uligundua kuwa katika beseni la kuogea la wanawake lenye mapovu, kiwango cha bakteria wa Legionella kilikuwa mara 620 zaidi ya kiwango kinachoruhusiwa. Katika beseni la ndani la wanaume, bakteria hao waligunduliwa kwa kiwango cha mara 270 zaidi, na katika beseni la ndani la wanawake, kiwango kilikuwa mara 150 zaidi ya kawaida.
Hadi sasa, watu watatu waliotembelea bafu hilo wamethibitishwa kuwa na maambukizi ya Legionellosis na wanapatiwa matibabu hospitalini. Hata hivyo, mamlaka za afya bado hazijaweza kubaini chanzo cha maambukizi kwa watu wawili kati ya hao watatu.
Akizungumza na waandishi wa habari, Rais wa kampuni ya Hakuho, Bi. Yasufuku Kumiko, aliomba radhi kwa usumbufu na wasiwasi uliosababishwa kwa wateja na wakazi wa eneo hilo.
Katika mkutano huo na waandishi wa habari, ilifahamika kuwa hadi jana, kampuni ilikuwa imepokea taarifa 47 kutoka kwa wateja wa bafu hilo wakilalamikia dalili kama vile maumivu ya kichwa, homa, kuhara, na kutapika. Hata hivyo, uhusiano kati ya dalili hizo na bakteria wa Legionella bado haujathibitishwa. Bi. Yasufuku alisema kuwa kampuni itawajibika na kutoa fidia iwapo itathibitika kuwa dalili hizo zimesababishwa na bakteria hao.
Upande wa Hakuho ulieleza kuwa huenda kusafisha kwa kina kwa mabomba yanayosambaza maji moto kwenye mabeseni na vifaa vinavyozalisha mapovu kwenye beseni lenye mapovu hakukufanyika kwa ufanisi wa kutosha. Pia, walidokeza kuwa sehemu zilizochakaa kati ya vigae vya beseni zinaweza kuwa zimekuwa mazingira mazuri kwa bakteria kuzaliana.
Hivi sasa, kampuni ya Hakuho inafanya matengenezo na ukarabati wa bafu hilo. Kuhusu lini bafu hilo litaanza tena kutoa huduma, msemaji wa kampuni alisema kuwa watazingatia hali itakavyokuwa baadaye kabla ya kufanya uamuzi.
Legionellosis ni ugonjwa wa kuambukiza unaosababishwa na bakteria wa Legionella. Bakteria hawa huishi vizuri katika maji ya vuguvugu yenye joto la kati ya nyuzi 25 hadi 45 Selsiasi na hupatikana sana kwenye vifaa vya kupasha maji, mifumo ya kupoza hewa, vifaa vya kuongeza unyevu kwenye hewa, bafu za maji moto, na chemchemi za maji. Maambukizi hutokea pale mtu anapovuta hewa iliyo na matone ya maji yaliyochafuliwa na bakteria hao.
Dalili za awali za ugonjwa huu ni pamoja na kukosa hamu ya kula, uchovu, maumivu ya kichwa, maumivu ya mwili, baridi, na homa kali. Dalili nyingine zinaweza kujumuisha kikohozi kikavu, kuhara, kichefuchefu, kutapika, na maumivu ya tumbo. Iwapo maambukizi yatapelekea kwenye nimonia, inaweza kuwa hatari na kusababisha kifo.
Kuna aina mbili za Legionellosis: homa ya Pontiac, ambayo ni rahisi na hupona yenyewe ndani ya siku mbili hadi tano bila matibabu maalum, na ugonjwa wa Legionnaires, ambao ni hatari zaidi na huhitaji matibabu ya antibiotiki. Kwa watu wenye kinga dhaifu ya mwili, ugonjwa huu unaweza kuwa mbaya sana na kusababisha vifo hadi asilimia 80. Hata hivyo, kwa watu wenye afya njema wanaopata matibabu kwa wakati, kiwango cha vifo ni kati ya asilimia 0 hadi 11.
Hili si tukio la kwanza kwa bafu maarufu za maji moto nchini Japani kugundulika kuwa na bakteria wa Legionella. Mnamo mwaka 2023, bafu moja la kifahari (ryokan) katika Mkoa wa Fukuoka, ambalo lilikuwa limefunguliwa kwa zaidi ya miaka 150, lilikumbana na utata baada ya kugundulika kuwa na kiwango cha bakteria wa Legionella mara 3,700 zaidi ya kiwango kinachoruhusiwa. Uchunguzi ulionyesha kuwa bafu hilo lilikuwa likibadilisha maji kwenye beseni la kuogea la umma mara mbili tu kwa mwaka.