Waziri wa Mifugo na Uvuvi, Dk. Ashatu Kijaji, ametoa maagizo mazito kwa Bodi mpya ya Ushauri ya Wakala ya Maabara ya Veterinari Tanzania (TVLA), ikiwa ni pamoja na kuhakikisha inasimamia nidhamu kwa watumishi wote wanaoshindwa kutekeleza majukumu yao ipasavyo. Maelekezo haya yalitolewa hivi karibuni wakati wa uzinduzi wa bodi hiyo uliofanyika Temeke, jijini Dar es Salaam.
Akizungumza katika hafla hiyo, Dk. Kijaji alisisitiza umuhimu wa uadilifu na uaminifu katika utendaji kazi wa bodi hiyo. "Nawaomba wajumbe wa Bodi, katika huduma mnazotoa kwa Watanzania, fanyeni kazi kwa uadilifu na uaminifu mkubwa. Watanzania wanatutegemea sana. Sisi ni watoa huduma na pia wadhibiti. Baadhi ya taasisi zinasahau jukumu lao la utoaji huduma na kujikita zaidi kwenye udhibiti. Kwa mwelekeo wa Serikali ya Awamu ya Sita, udhibiti lazima uwe wa kuwezesha uwekezaji na ufanyaji biashara, na maelekezo tuliyonayo ni kuwezesha wawekezaji wetu," alisema Dk. Kijaji.
Aidha, Waziri huyo aliishauri Bodi hiyo kuhakikisha kuwa wakati wa kuandaa mpango mkakati mpya wa TVLA, wanazingatia Dira ya Taifa ya miaka 25 ijayo. Alieleza kuwa mpango wa Wakala unapaswa kuendana na Dira ya Taifa inayoanza mwaka 2026 hadi 2050.
Dk. Kijaji pia aliitaka Bodi ya TVLA kusimamia kwa ufanisi afya za mifugo nchini. Alishauri Wakala kuwa kituo cha umahiri katika kutoa bidhaa na kufanya tafiti za magonjwa ya wanyama na wadudu waenezao ndani na nje ya nchi.
Naibu Katibu Mkuu wa Wizara ya Mifugo na Uvuvi (Mifugo), Bwana Abdul Mhinte, alieleza kuwa Wizara ina taasisi nyingi katika sekta ya mifugo, na TVLA ni taasisi mama ambayo inachangia kwa kiwango kikubwa katika sekta hiyo. Alisema kuwa taasisi hiyo inasaidia kuhakikisha sekta ya mifugo haiyumbi, na kwa sasa Wizara inategemea mchango mkubwa kutoka kwa Bodi mpya.
"Katika kipindi hiki ambacho mmeteuliwa kwenye Bodi hii, tunatarajia muendeshe taasisi hii kiuchumi. Na ili kuonyesha hilo, tumeona mnashiriki hata kwenye zabuni za kusambaza chanjo nchini. Tunatarajia katika siku za usoni, taasisi hii itafanya zaidi ya inavyofanya sasa. Na kwa uongozi wenu, tunatarajia taasisi hii, mbali na kushiriki kwenye zabuni hapa nchini, iwe na uwezo wa kushiriki hata nje ya Tanzania, tuweze kuuza chanjo nje na kutoa huduma," alisema Bwana Mhinte.
Aliongeza kuwa kipindi hiki ni muhimu, na wanatarajia mabadiliko makubwa katika taasisi hiyo.
Mwenyekiti wa Bodi ya Ushauri ya TVLA, Profesa Amandus Muhairwa, alimshukuru Waziri wa Mifugo na Uvuvi, Dk. Kijaji, kwa kuwaamini na kuwateua kushika dhamana ya kusimamia na kushauri maendeleo ya TVLA, ambayo ni taasisi muhimu katika uimarishaji wa afya za mifugo nchini.
"TVLA imekuwa ikifanya kazi muhimu katika kutoa huduma za uchunguzi wa magonjwa ya mifugo, uzalishaji, usambazaji na usimamizi wa matumizi bora ya chanjo za mifugo pamoja na kufanya tafiti za kisayansi zinazosaidia kukuza sekta ya Mifugo nchini. TVLA ni kichocheo muhimu katika kuhakikisha mifugo inakuwa na afya bora na hivyo kusaidia kuongeza uzalishaji na kipato kwa wafugaji wetu," alisema Profesa Muhairwa.