Fursa adhimu ya soko la kimataifa la nyama imefunguliwa kwa wafugaji wa Tanzania, kufuatia uamuzi wa kihistoria wa Rais Dkt. Samia Suluhu Hassan kuidhinisha kiasi cha Shilingi bilioni 216 kwa ajili ya ruzuku ya chanjo na utambuzi wa mifugo nchi nzima. Mpango huu unalenga kubadilisha maisha ya wafugaji na kuifanya sekta ya mifugo kuwa mchangiaji mkuu katika uchumi wa taifa.
Akizungumza wilayani Ngorongoro mkoani Arusha, Julai 3, 2025, wakati akihitimisha ziara yake, Waziri wa Mifugo na Uvuvi, Dkt. Ashatu Kijaji, alisema hatua hiyo ni ushahidi usiopingika wa upendo na dhamira ya dhati ya Rais Samia katika kuwainua wafugaji. Alieleza kuwa tayari Shilingi bilioni 65 zimeshatolewa kwa ajili ya utekelezaji wa zoezi hilo kwa mwaka huu wa fedha.
"Huu ni uwekezaji mkubwa ambao unakwenda moja kwa moja kumgusa mfugaji. Tayari tuna soko la kimataifa linalohitaji tani 50,000 za nyama, lakini sharti ni kwamba nyama hiyo itokane na mifugo iliyochanjwa na kutambuliwa. Rais Samia amefungua mlango huu kwa vitendo," alisema Dkt. Kijaji.
Kampeni hii ya kitaifa, ambayo ni sehemu ya Mpango wa Miaka Mitano wa Uboreshaji wa Sekta ya Mifugo, ilizinduliwa rasmi na Rais Samia mwenyewe mnamo Juni 16, 2025, wilayani Bariadi, Simiyu. Lengo lake kuu ni kuhakikisha mifugo inapata chanjo muhimu dhidi ya magonjwa na kuwekewa alama za utambuzi (hereni), hatua itakayoongeza thamani ya mifugo na kuruhusu nyama ya Tanzania kukidhi vigezo vya masoko ya kimataifa.
Waziri Kijaji alisisitiza kuwa kampeni itaendelea kwa kasi katika mikoa mbalimbali nchini, ikiwemo Mara, Simiyu, Geita, Pwani, Morogoro, Tabora, na Dodoma, ili kuhakikisha hakuna mfugaji anayeachwa nyuma. "Tunataka kubadilisha fikra kutoka kwenye ufugaji wa kuhesabu mifugo kama utajiri hadi ufugaji wa kibiashara unaozalisha kipato halisi kwa mfugaji na taifa," alihitimisha.