Waziri wa Kilimo, Mhe. Daniel Chongolo, amezitaka Bodi za Mazao ya Kimkakati nchini kuacha kufanya kazi kwa mazoea na badala yake zije na mbinu za "kibabe" zitakazomkomboa mkulima kutoka kwenye kilimo cha kujikimu kwenda kilimo cha kibiashara chenye tija.
Akizungumza jana jijini Dodoma katika kikao kazi kizito kilichowakutanisha wenyeviti na watendaji wakuu wa bodi za Kahawa, Tumbaku, Pamba, na Sukari, Waziri Chongolo ameweka wazi kuwa serikali haitavumilia kuona wakulima wanavuja jasho bila kupata faida inayoendana na nguvu wanayotumia. Waziri huyo amesisitiza kuwa wakati wa kulima kienyeji umepitwa na wakati na sasa ni lazima taasisi hizo zibuni mikakati endelevu ya kuzalisha kwa wingi na kutafuta masoko ya uhakika.
Sukari: Elimu na Nishati Mpya ya 'Ethanol' Katika kile kinachoonekana kama mkakati wa kumaliza changamoto ya sukari nchini, Waziri Chongolo ameielekeza Bodi ya Sukari Tanzania (SBT) kuanzisha mfuko maalum wa fedha. Mfuko huo utakuwa na jukumu la kugharamia uendeshaji wa Chuo cha Taifa cha Sukari (National Institute of Sugar - NIS), ili kiweze kutoa elimu inayoendana na kasi ya dunia.
"Tunataka chuo hiki kiwe jiko la kupika wataalamu. Lazima tutengeneze mitaala inayoendana na teknolojia ya kisasa ya viwanda. Hatuwezi kuendelea na mitaala ya kale wakati dunia inakimbia," alisisitiza Chongolo.
Aidha, ametoa agizo jipya na zito kwa bodi hiyo kuanza mchakato wa kuzalisha nishati ya 'Ethanol' kibiashara. Hatua hii inatazamwa kama fursa mpya ya kiuchumi itakayoongeza thamani ya zao la miwa zaidi ya sukari ya mezani pekee, huku akisisitiza hitaji la kujitosheleza kwa sukari ndani ya nchi ili kumaliza kero ya uagizaji kutoka nje.
Kahawa: AMCOS Zipewe Nguvu ya Mashine Akihamishia nguvu kwenye zao la Kahawa ambalo ni dhahabu ya kijani kwa mikoa ya Kaskazini na Nyanda za Juu Kusini, Waziri Chongolo ameitaka Bodi ya Kahawa Tanzania (TCB) kuhakikisha Vyama vya Msingi vya Ushirika (AMCOS) vinapata meno. Ameagiza bodi hiyo kusimamia AMCOS kutenga bajeti ya kununua mashine za kukoboa kahawa (hulling machines).
Lengo la agizo hili ni kumuwezesha mkulima kuongeza thamani ya zao lake kabla ya kuliuza. "Mkulima anapouza kahawa iliyokobolewa anapata bei nzuri zaidi. Tukienda hivyo, mkulima atajitoa kwa moyo wote, na sisi Serikali tutajitoa kumuunga mkono ili ahisi fahari ya kuwa mkulima wa kahawa," alifafanua.
Pamba na Tumbaku: Teknolojia na TARI Kwenye zao la Pamba, maarufu kama "Dhahabu Nyeupe", Waziri Chongolo ameikumbusha Bodi ya Pamba umuhimu wa sayansi. Ameitaka bodi hiyo kukaa meza moja na Taasisi ya Utafiti wa Kilimo Tanzania (TARI) ili kuzalisha mbegu bora.
"Tusizalishe hasara, bali tuzalishe tija. Hatuwezi kuendelea na mazingira yale yale ya kuvuna kidogo kwenye eneo kubwa. Ni lazima kumlinda mkulima kwa kumpa mbegu zinazotoa mavuno mengi na kupunguza gharama za uzalishaji," alieleza kwa mkazo.
Kuhusu zao la Tumbaku, ambalo mara nyingi limekuwa likilalamikiwa kwa uharibifu wa mazingira kutokana na ukataji miti kwa ajili ya kukaushia, Waziri Chongolo amekuja na suluhisho la kiteknolojia. Ameagiza Bodi ya Tumbaku kuiga teknolojia kutoka mataifa ya China na Vietnam ya kutumia nishati ya jua (solar energy) kukaushia tumbaku. Hatua hii inalenga kuokoa misitu ya Tanzania na wakati huo huo kuongeza ubora wa tumbaku hiyo sokoni.
Kikao hicho cha Dodoma kinatafsiriwa kama dira mpya ya Wizara ya Kilimo katika kuhakikisha sekta hiyo inabaki kuwa uti wa mgongo wa uchumi wa Tanzania, si kwa maneno tu, bali kwa vitendo na takwimu.