Hali ya hewa ndani ya Mitaa ya Msimbazi, Kariakoo, bado ni ya vuguvugu huku mabosi wa Klabu ya Simba wakiwa katika mbio kali za kusaka 'Jembe' jipya litakalokuja kuokoa jahazi linaloyumba, hasa katika michuano ya kimataifa. Baada ya kutimuliwa kwa kocha Dimitar Pantev kufuatia matokeo yasiyoridhisha, macho yote sasa yameelekezwa Afrika Kusini (Sauzi), ambako jina jipya limeibuka na kuteka hisia za wengi.
Taarifa za ndani kutoka viunga vya soka nchini Afrika Kusini zinamtanabaisha Nermin Basic, Mkurugenzi wa Ufundi wa klabu ya TS Galaxy, kama chaguo namba moja linalopewa nafasi kubwa ya kutua Dar es Salaam kuinoa 'Mnyama'. Basic, raia wa Bosnia mwenye uzoefu wa soka la Afrika, anaonekana kuwapiku makocha wengine wakubwa waliokuwa wakitajwa awali.
Vita ya 'CV' Nzito: Basic vs Barker
Awali, jina la Steve Barker, kocha wa zamani wa Stellenbosch FC ambaye kwa sasa anakinoa kikosi cha AmaZulu, lilikuwa likipewa nafasi kubwa. Hata hivyo, upepo umebadilika ghafla. Chanzo cha kuaminika kimeiambia *Soccer Laduma*, jarida maarufu la soka nchini Afrika Kusini, kwamba mabosi wa Simba wamevutiwa zaidi na wasifu wa Nermin Basic kutokana na uzoefu wake wa kiufundi na mbinu zake.
"Kwa sasa mezani kuna makocha wanne wababe, lakini vita kubwa ipo kwa hawa wawili kutoka Sauzi; Nermin Basic na Steve Barker. Hata hivyo, taarifa za 'chini ya kapeti' zinasema Mkurugenzi wa Ufundi wa TS Galaxy (Basic) ndiye anapewa kipaumbele zaidi. Yeye ndiye chaguo namba moja na mazungumzo yanaelekea pazuri," kilidokeza chanzo hicho.
Basic si mgeni na soka la Kaskazini mwa Afrika pia, kwani aliwahi kuifundisha US Monastir ya Tunisia, jambo linalompa alama za ziada kwa mabosi wa Simba ambao wanatamani kocha anayejua "siasa" na mbinu za soka la Waarabu na Afrika kwa ujumla.
Ahmed Ally: "CV 240 Mezani, Tunataka Mtu wa Kazi"
Akizungumzia mchakato huo mzito, Meneja wa Habari na Mawasiliano wa Simba, Ahmed Ally, maarufu kama 'Semaji la CAF', amewatoa hofu Wanasimba kwa kueleza kuwa ofisi za klabu hiyo zimefurika maombi.
"Hii ndiyo Simba bwana, ukubwa wetu unajidhihirisha. Makocha 240 kutoka kona mbalimbali za dunia wameleta maombi yao wakitamani kuvaa gwanda la Wekundu wa Msimbazi. Hii inatokana na ukweli kwamba Simba ni 'Brand' kubwa Afrika," alisema Ahmed Ally kwa mbwembwe zake za kawaida.
Ahmed alisisitiza kuwa uongozi hautaki kukurupuka. Lengo ni kupata mwalimu sahihi atakayeweza kuendana na falsafa ya klabu na kurejesha makali ya timu hiyo ambayo imepoteza michezo yote miwili ya awali ya hatua ya makundi ya Ligi ya Mabingwa Afrika.
"Hatutaki kukosea. Viongozi wanapitia rekodi kwa umakini mkubwa, wasifu, na sifa za ziada. Tunatarajia ifikapo Desemba 28, wakati kikosi kitakaporejea kambini kuanza mazoezi, tuwe tumeshakamilisha benchi la ufundi. Tunataka kocha atakayekuja kufanya kazi ya kupendeza na kuwapa raha Wanasimba," aliongeza Ahmed.
Orodha ya Mastaa: Yumo Ex-Yanga na Mzambia
Mbali na Basic na Barker, orodha ya wanaomezea mate kiti hicho ni ndefu na yenye majina ya kutisha. Yumo Romain Folz, kocha kijana aliyewahi kuifundisha Yanga kwa muda mfupi na baadaye kutimkia Afrika Kusini. Pia, jina la Honor Janza, Mzambia aliyewahi kuiongoza Taifa Stars na Namungo FC, nalo linatajwa.
Vigogo wengine ni pamoja na Hubert Velud, kocha mzoefu aliyewahi kupita TP Mazembe, USM Alger na Etoile du Sahel. Pia yumo Eric Tinkler, kocha mwenye heshima kubwa Afrika Kusini aliyewahi kupita Orlando Pirates na SuperSport United.
Wakati mchakato ukiendelea, mashabiki wa Simba wanashikilia pumzi zao wakisubiri kuona ni nani atapewa jukumu la kuiongoza timu hiyo katika kipindi hiki kigumu, huku kiu yao kubwa ikiwa ni kuona timu inafanya vizuri kimataifa na kwenye Ligi Kuu Bara.