Mabingwa wa zamani wa Ligi Kuu, Simba SC, wameondoka nchini kuelekea Botswana kwa ajili ya mchezo wao wa kwanza wa Ligi ya Mabingwa Afrika, huku wakiacha nyuma maumivu ya kufungwa na Yanga, lakini pia kukiwa na manung'uniko mazito kutoka kwa uongozi. Kocha wa timu hiyo, Fadlu Davids, amewataka mashabiki kutulia, akisema matokeo ya Ngao ya Jamii hayawezi kuvuruga malengo makuu ya msimu.
Akizungumza kabla ya safari, Kocha Fadlu alikiri kuwa uchungu wa kupoteza mchezo wa watani wa jadi kwa bao 1-0 upo, lakini akasisitiza kuwa huo si mwisho wa safari yao. Alisema akili na nguvu zao sasa zimeelekezwa kwenye kampeni za kimataifa, ambapo wanaenda Botswana wakiwa na dhamira moja tu ya kupata ushindi na kuanza vyema michuano hiyo.
"Nafahamu maumivu waliyonayo mashabiki wetu, kwa sababu ulikuwa mchezo wenye hisia kali. Hata hivyo, tunapaswa kuinua vichwa na kuangalia mbele. Dhamira yetu ya msimu bado iko imara. Tunaenda Botswana tukiwa na lengo la ushindi ili kuanza vizuri Ligi ya Mabingwa," alisema kocha huyo Mzawa wa Afrika Kusini.
Wakati kocha akijaribu kutuliza hali ya hewa, Mwenyekiti wa Klabu, Murtaza Mangungu, alionyesha kutoridhishwa kabisa na maamuzi ya waamuzi wa mchezo huo. Mangungu alikosoa vikali Shirikisho la Soka Tanzania (TFF) kwa kile alichodai ni kukiuka makubaliano ya kutumia waamuzi kutoka nje ya nchi kwenye michezo ya watani wa jadi ili kuepuka maamuzi yenye utata.
"Tulikubaliana na TFF kwamba mechi hizi za Simba na Yanga zichezeshwe na waamuzi wa kigeni ili kuondoa malalamiko ya mara kwa mara. Lakini cha kushangaza, hilo halikutimizwa na matokeo yake ndiyo haya, tumeshuhudia tena maamuzi yale yale ya hovyo," alisema Mangungu kwa masikitiko. Uongozi wa Simba unalalamikia uhalali wa goli pekee lililofungwa na Pacome Zouzoua, wakiamini kulikuwa na ukiukwaji wa sheria kabla ya kufungwa.
Katika mchezo huo wa kufungua pazia la msimu mpya wa Ligi Kuu 2025/2026, Yanga waliibuka washindi na kufanikiwa kutetea taji lao la Ngao ya Jamii kwa mara nyingine.