Mashabiki wa soka nchini Tanzania wanajiandaa kushuhudia mtanange mwingine wa kukata na shoka utakaofungua pazia la msimu mpya wa 2025/26, wakati mabingwa watetezi, Yanga SC, watakapomenyana na mahasimu wao wa jadi, Simba SC, katika pambano la Ngao ya Jamii. Mchezo huo unatarajiwa kupigwa Septemba 16 kwenye Uwanja wa Benjamin Mkapa jijini Dar es Salaam.
Kuelekea pambano hilo, uongozi wa Yanga kupitia kwa Makamu wa Rais wake, Arafat Haji, umeweka wazi kuwa tayari wameanza maandalizi kuhakikisha taji hilo linabaki makao makuu ya klabu, Jangwani. Haji alisisitiza kuwa mchezo huo ndio utakaoweka heshima na mwelekeo wa Yanga kwa msimu mzima ujao.
Akizungumza kwa kujiamini, Haji alisema, "Tuna kazi tarehe 16, jamaa walitamani ule mfumo ungeendelea, walitamani ungendelea kuchezwa kwa mfumo wa nusu fainali ili watukimbie tena, lakini wanasema Mungu si Athumani, kawaleta, siku hiyo tutaanza kuweka heshima ya Yanga kwa msimu wa 2025/26." Kauli hii inadhihirisha kiu ya Yanga kuendeleza ubabe wao dhidi ya Simba.
Aidha, alitoa wito kwa Wanayanga wote kuongeza maradufu ule ushirikiano uliooneshwa msimu uliopita ili kufanikisha lengo lao la kutwaa Ngao ya Jamii kwa mara nyingine.
Msimu huu, Shirikisho la Mpira wa Miguu Tanzania (TFF) limefanya mabadiliko kwenye mfumo wa mashindano ya Ngao ya Jamii. Badala ya muundo wa timu nne kucheza nusu fainali na fainali, kutakuwa na mchezo mmoja tu. Mabadiliko haya yametokana na kubanwa kwa ratiba, hasa kutokana na Tanzania kuwa mwenyeji wa fainali za CHAN zinazofikia tamati Agosti 30.
Kanuni mpya zinaelekeza kuwa endapo bingwa wa Ligi Kuu ndiye huyo huyo bingwa wa Kombe la Shirikisho (FA Cup), kama ilivyotokea kwa Yanga, basi atacheza na timu iliyoshika nafasi ya pili kwenye Ligi Kuu, ambayo ni Simba. Endapo mfumo wa zamani ungetumika, Yanga ingepambana na Azam FC huku Simba ikikipiga dhidi ya Singida Black Stars katika nusu fainali.
Kiburi cha Yanga kinachochewa na rekodi yao ya hivi karibuni dhidi ya Simba, ambapo wamewafunga mara tano mfululizo. Ushindi huo unajumuisha mechi nne za Ligi Kuu (nyumbani na ugenini kwa misimu miwili) na ushindi katika nusu fainali ya Ngao ya Jamii iliyopita.
Katika msimu uliopita, Yanga ilitwaa taji hili baada ya kuifunga Azam FC kwa mabao 4-1 katika fainali iliyopigwa Agosti 11. Mabao ya Yanga yalifungwa na Prince Dube, Yoro Diaby (aliyejifunga), Stephane Aziz Ki, na Clement Mzize, huku bao la kufutia machozi la Azam likifungwa na nyota wao wa zamani, Feisal Salum 'Fei Toto'.