Jiji la Dar es Salaam linatarajiwa kusimama kwa muda leo wakati waasisi wa matamasha ya soka Afrika Mashariki, Simba SC, watakapoadhimisha kilele cha tamasha lao la 17, maarufu kama 'Simba Day'. Uwanja wa Benjamin Mkapa utafurika mashabiki wekundu na weupe watakaoshuhudia burudani mbalimbali, utambulisho wa kikosi cha msimu mpya, na mtanange wa kimataifa wa kirafiki dhidi ya wababe wa soka la Kenya, Gor Mahia.
Tukio hili, ambalo limekuwa utamaduni tangu mwaka 2009, ndio jukwaa rasmi ambalo Simba huonyesha sura mpya ya timu yao. Kocha Mkuu Fadlu Davids amesema mashabiki watarajie mabadiliko makubwa, akitumia kauli ya ujenzi kuelezea maendeleo ya kikosi chake. "Msimu uliopita tulijenga msingi imara, msimu huu sasa tunapandisha ukuta. Malengo yetu ni kurudisha heshima kwa kutwaa makombe," alisema kocha huyo aliyesimamia maandalizi ya wiki sita.
Shauku kubwa ya mashabiki ipo kwa nyota wapya waliosajiliwa. Majina kama Rushine De Reuck na Neo Maema kutoka Mamelodi Sundowns ya Afrika Kusini, Jonathan Sowah kutoka Ghana, Allasane Kante kutoka Senegal, na Naby Camara kutoka Guinea ni miongoni mwa yale yatakayotikisa uwanja yatakapotambulishwa rasmi. Hawa wanaungana na wazawa kama Antony Mligo na wengineo kuunda kikosi kinachotegemewa kuleta mapinduzi.
Wapinzani wao, Gor Mahia, hawakuja nchini kwa ajili ya utalii. Kocha wao Mkuu, Charles Akonnor, amekiri ukubwa na heshima ya Simba barani Afrika lakini akasisitiza kuwa wamejipanga kushindana na kushinda. "Tunaiheshimu Simba na tunajua ukubwa wa Simba Day. Hata hivyo, mechi hii ni kipimo muhimu sana kwetu kabla ya kuanza Ligi Kuu ya Kenya. Tumekuja kupambana na tunataka ushindi," alisema Akonnor.
Historia inaonesha kuwa Simba Day ya kwanza ilifanyika mwaka 2009 chini ya uenyekiti wa Hassan Dalali, ambapo walicheza na SC Villa ya Uganda na kushinda 1-0. Tangu wakati huo, tamasha hili limekuwa chachu kwa klabu nyingine nyingi nchini na katika ukanda mzima wa CECAFA kuiga na kuanzisha matamasha yao, jambo linalothibitisha ubunifu na uongozi wa Simba katika medani ya soka.