Waziri Mkuu, Kassim Majaliwa, ametoa agizo zito la kufanyika kwa uchunguzi wa kina dhidi ya viongozi wa taasisi zote za umma ambazo zimeshindwa kujiunga na mfumo wa kisasa wa kielektroniki wa utunzaji nyaraka na mawasiliano (Ofisi Mtandao). Akizungumza kwa ukali, Waziri Mkuu alionyesha wasiwasi wake kuwa huenda taasisi hizo zinahifadhi "magenge ya uhalifu" na zinakwepa mfumo huo kimakusudi ili kuficha taarifa zao zisiwe wazi kwa umma na vyombo vya usimamizi.
Agizo hilo limetolewa jijini Dar es Salaam wakati wa ufunguzi wa Mkutano wa 13 wa Chama cha Wataalam wa Menejimenti ya Kumbukumbu na Nyaraka Tanzania (TRAMPA). Bwana Majaliwa alikumbusha kuwa muda wa mwisho uliotolewa na serikali kwa taasisi zote kujiunga na mfumo huo ulikuwa ni mwezi Julai mwaka huu, na kushindwa kufanya hivyo ni dharau na kunaashiria kuwepo kwa mianya ya ubadhirifu.
"Mfumo huu unaweka uwazi na uwajibikaji wa haraka. Taasisi ambayo haitaki kujiunga, ni wazi ina mambo inayoyaficha. Nimeagiza wachunguzwe, haiwezekani serikali inaweka utaratibu wa kisasa wa kazi, wengine wanabaki na mafaili yao gizani," alisisitiza Waziri Mkuu.
Aliwataka wataalamu hao wa kumbukumbu, ambao aliwaita "wabeba maono na watunza siri za serikali," kuhakikisha wanadumisha uadilifu, wanalinda usiri wa nyaraka za serikali, na wanajiendeleza kielimu ili kwenda sambamba na kasi ya teknolojia.
Mapema, Mwenyekiti wa TRAMPA, Devota Mrope, aliunga mkono agizo hilo, akisema matumizi ya Ofisi Mtandao ni muarobaini wa kupunguza urasimu na kuongeza ufanisi katika utoaji wa huduma za umma. Hata hivyo, alitoa ombi zito kwa serikali, akitaka ofisi ya Mdhibiti na Mkaguzi Mkuu wa Hesabu za Serikali (CAG) ianze kukagua pia masijala za serikali.
"Tunaomba hata Mwenge wa Uhuru unapopita, ukague hali ya masijala zetu kwenye halmashauri. Nyingi ziko katika hali mbovu na chakavu, jambo ambalo linaweka siri za taifa rehani na kutoa mianya kwa maadui," alisema Bi. Mrope, akionesha udhaifu uliopo katika utunzaji wa nyaraka kwa njia ya makaratasi.
Mkutano huo ulihudhuriwa na viongozi mbalimbali wa serikali, akiwemo Waziri George Simbachawene na Waziri Haroun Ali Suleiman wa Zanzibar, kuashiria uzito wa suala la utawala bora na matumizi ya TEHAMA serikalini.