Kufuatia maswali mazito yaliyoibuliwa na Mwenyekiti wa CHADEMA, Tundu Lissu, kuhusu uhalali wa mwenendo wa kesi yake ya uhaini, Mahakama Kuu ya Tanzania imetoa ufafanuzi, ikisema kuwa taratibu zote zilizotumika, ikiwemo kupanga tarehe ya hukumu mapema, ni sahihi na zinafuata sheria za nchi.
Akitoa maelezo kwa niaba ya jopo la majaji, Jaji Dunstan Ndunguru alieleza kuwa kitendo cha kuweka tarehe ya hukumu kwenye ratiba ya kesi kabla ya ushahidi kusikilizwa si kigeni. Alisema kinazingatia masharti ya Kifungu cha 185(1) na (2) cha Sheria ya Mwenendo wa Mashauri ya Jinai (CPA), ambacho kinampa Jaji Mkuu mamlaka ya kuweka miongozo ya uendeshaji wa kesi za jinai katika Mahakama Kuu.
"Miongozo hiyo inaelekeza kuwa mashauri ya jinai yanaendeshwa kwa muda maalum, mara nyingi siku 30, ambazo zinajumuisha pia tarehe ya hukumu. Hii ni kwa ajili ya usimamizi bora wa muda, na ratiba inaweza kubadilika kulingana na mazingira ya kesi," alifafanua Jaji Ndunguru.
Kuhusu suala la kikao cha awali (pre-session meeting), Mahakama ilisema ni utaratibu wa kawaida wa kuzikutanisha pande mbili ili kuondoa vikwazo vidogo vidogo kabla ya kesi kuanza rasmi, na kwamba kutofanyika kwake hakuathiri haki ya upande wowote.
Kuhusu malalamiko ya watu kuzuiwa kuingia mahakamani, Mahakama ilisema haizuii watu, lakini taratibu za usalama na mpangilio lazima zifuatwe. Ilimwagiza Msajili wa Mahakama kuhakikisha anapitia orodha iliyowasilishwa na Lissu ili kuruhusu walioidhinishwa kuingia.
Lissu anakabiliwa na shtaka la uhaini, akidaiwa kuchapisha maneno yenye nia ya uchochezi mnamo Aprili 3, 2025, ili kushawishi umma kuzuia kufanyika kwa Uchaguzi Mkuu wa mwaka 2025.