Katika hatua muhimu ya kesi ya uhaini inayomkabili Mwenyekiti wa CHADEMA, Tundu Lissu, Mahakama Kuu Masjala Ndogo ya Dar es Salaam imetoa uamuzi mchanganyiko kuhusu mapingamizi yake ya awali. Huku ikitupilia mbali hoja zake nyingi za kiutaratibu, mahakama imempa ushindi muhimu kwa kumruhusu kuwasilisha orodha ya mashahidi wake, haki anayodai alinyimwa katika mahakama ya chini.
Jopo la majaji watatu, likiongozwa na Jaji Dunstan Ndunguru, lilitoa maamuzi hayo Jumanne, Septemba 16, 2025, baada ya kupitia kwa kina hoja za pande zote mbili. Hoja kuu ya ushindi kwa upande wa Lissu ilikuwa ni kuhusu haki ya kuita mashahidi. Mahakama ilikiri kuwa ingawa orodha hiyo haikuwasilishwa katika Mahakama ya Hakimu Mkazi Kisutu, Mahakama Kuu itahakikisha anapata fursa hiyo. "Mshtakiwa ana haki ya kuita mashahidi wake. Mahakama hii haitamnyima haki hiyo," alisisitiza Jaji Ndunguru, akiondoa hofu ya Lissu kuhusu maandalizi ya utetezi wake.
Hata hivyo, mahakama ilitupilia mbali hoja nyingine kadhaa zilizowasilishwa na Lissu. Kuhusu madai kwamba Mahakama ya Kisutu haikuwa na mamlaka ya kushughulikia kesi hiyo kwa sababu alikamatwa Mbinga, majaji walieleza kuwa Sheria ya Mwenendo wa Makosa ya Jinai (CPA) inaruhusu mahakama yoyote yenye uwezo kufanya ukabidhi (committal proceedings) wa kesi kwenda Mahakama Kuu.
Vilevile, madai ya kunyimwa haki ya kusema lolote baada ya kusomewa maelezo ya mashahidi yalitupwa, huku mahakama ikisema kumbukumbu zinaonyesha alipewa fursa hiyo na hakuna uthibitisho wa yeye kunyimwa. Kadhalika, makosa madogo ya kiuandishi, kama vile tarehe, yalionekana kutokuwa na uzito wa kisheria wa kubatilisha mwenendo mzima wa kesi.
Baada ya maamuzi hayo, kesi ilichukua sura mpya. Lissu alitakiwa kujibu shtaka la uhaini linalomkabili. Badala ya kusema "kweli" au "si kweli," alizindua shambulizi jipya la kisheria, akipinga uhalali wa hati ya mashtaka yenyewe. Akirejea vifungu mbalimbali vya Sheria ya CPA, Lissu alidai kuwa hawezi kujibu shtaka ambalo hati yake ni batili kisheria.
Hoja yake ya msingi ilikuwa kwamba hati ya mashtaka inapaswa kueleza kosa mahususi analoshtakiwa nalo kwa mujibu wa sheria. Alidai kuwa maelezo yaliyomo kwenye hati anayoshtakiwa nayo hayaoneshi kosa lolote la uhaini linalotambulika kisheria nchini. "Hii hati haina kosa la uhaini," Lissu alisisitiza mbele ya jopo, akidai kuwa kitendo anachotuhumiwa nacho cha eti "kuzuia uchaguzi" hakijawahi kufasiriwa kama kosa la uhaini katika sheria za nchi.
Kutokana na uzito wa hoja hizo mpya, mahakama iliahirisha kesi hadi leo Jumatano, ambapo Lissu ataendelea kufafanua pingamizi lake dhidi ya uhalali wa hati ya mashtaka, jambo linaloashiria kuwa vita vya kisheria katika shauri hili bado vina safari ndefu.