Mahakama Kuu ya Tanzania, Kanda ya Dar es Salaam, imeamua kuwa mashahidi wa kiraia katika kesi ya uhaini inayomkabili Mwenyekiti wa CHADEMA, Tundu Lissu, hawatatambulika kwa majina yao hadharani. Uamuzi huo umetokana na ombi la Mkurugenzi wa Mashtaka (DPP) aliyeomba ulinzi wa mashahidi hao, akidai kuwa wamekuwa wakitishiwa na watu wanaofahamiana na mshtakiwa.
Jaji Hussein Mtembwa, akitoa uamuzi huo jana, alisema ushahidi uliowasilishwa na Kamishna Msaidizi wa Polisi (ACP) Amini Mahamba unaonyesha kuwa mashahidi wamekuwa wakipokea vitisho, jambo linaloweza kuhatarisha usalama wao na wa familia zao. Alifafanua kuwa kosa la uhaini ni zito, na uamuzi huo unalenga kulinda mchakato wa haki. "Ni wazi kuwa kosa linalomkabili mshtakiwa ni miongoni mwa makosa mazito... kuna ushahidi wa kutosha kwamba mashahidi wapo katika hatari ya kushambuliwa," alisema Jaji Mtembwa.
Aidha, Mahakama imetoa agizo kali kwa vyombo vyote vya habari, ikivizuia kuchapisha au kusambaza taarifa yoyote inayoweza kufichua utambulisho wa mashahidi hao bila ruhusa ya Mahakama. Lengo ni kuhakikisha ulinzi wa mashahidi unakuwa kamili, ndani na nje ya Mahakama. "Hakuna maana ya kuwalinda mahakamani, halafu vyombo vya habari vikatangaza majina yao kwa hadhira. Ulinzi wa mashahidi lazima uende sambamba ndani na nje ya chombo cha sheria," alisisitiza Jaji.
Hata hivyo, ulinzi huu utawahusu mashahidi wa kiraia pekee. Mashahidi ambao si raia au ni maofisa wa Serikali wataendelea kutoa ushahidi wao kama kawaida bila kufichwa. Pamoja na uamuzi huu, Jaji Mtembwa aliitaka Ofisi ya DPP kuhakikisha Tundu Lissu anaelezwa kwa uwazi kiini cha mashtaka yanayomkabili, ili asiathiriwe katika haki yake ya kujitetea.
Lissu anakabiliwa na mashtaka ya uhaini kufuatia kauli anazodaiwa kuzitoa jijini Dar es Salaam mnamo Aprili 3, 2025, ambapo anadaiwa kuhimiza uasi na kuvuruga Uchaguzi Mkuu ujao. Kesi hiyo inaendelea kusikilizwa katika Mahakama ya Hakimu Mkazi Kisutu, huku Mahakama Kuu ikishughulikia masuala mbalimbali ya kisheria yanayoambatana nayo.