Hali ya kisiasa nchini Cameroon imeingia katika sura mpya ya sintofahamu na mvutano, baada ya mgombea mkuu wa upinzani, Issa Tchiroma Bakary, kujitangazia ushindi katika uchaguzi wa urais uliofanyika Jumapili iliyopita. Katika hatua ya kijasiri, Bw. Tchiroma amemtaka rais wa sasa, Paul Biya, anayetawala kwa miaka 43, akubali matokeo ya kile alichokiita "ukweli wa sanduku la kura" la sivyo atalitumbukiza taifa katika machafuko.
Akizungumza kupitia video aliyoichapisha kwenye ukurasa wake wa Facebook, Tchiroma (79), ambaye aliwahi kuwa waziri katika serikali ya Biya, alisisitiza kuwa ushindi wa chama chake cha FNSC ni dhahiri na hauna ubishi. "Ushindi wetu uko wazi na ni lazima uheshimiwe," alisema, akiahidi kutoa matokeo ya kina ya kura kwa kila eneo katika siku chache zijazo.
Hata hivyo, chama tawala cha Rais Biya, CPDM, kimejibu mapigo kwa kupuuza vikali madai hayo. Naibu Katibu Mkuu wa chama hicho, Gregoire Owona, alisema Tchiroma hajashinda na wala hana takwimu zozote za kuthibitisha madai yake. Kauli hizi zinazokinzana zimeongeza joto la kisiasa, huku raia takriban milioni nane wakisubiri kwa hamu matokeo rasmi yatakayotangazwa na Tume ya Uchaguzi kabla ya Oktoba 26.
Tchiroma, ambaye alijiuzulu uwaziri na kuhama chama tawala mwezi Juni ili kuwania urais, alionekana ndiye mpinzani pekee mwenye nguvu wa kumkabili Rais Biya (92), hasa baada ya mwanasiasa mwingine mashuhuri wa upinzani, Maurice Kamto, kuzuiwa kushiriki. Wakati wa kampeni, Tchiroma alivuta umati mkubwa na kupata uungwaji mkono kutoka kwa vyama vingine vya upinzani na asasi za kiraia.
Historia inaonekana kujirudia nchini Cameroon. Katika uchaguzi wa mwaka 2018, Maurice Kamto pia alijitangazia ushindi siku chache baada ya kura kupigwa, kitendo kilichosababisha akamatwe na wafuasi wake wengi kufungwa jela. Wakati huo, Rais Biya alitangazwa mshindi kwa zaidi ya asilimia 70 ya kura, katika uchaguzi uliokumbwa na madai ya wizi wa kura na idadi ndogo ya wapiga kura waliojitokeza.