Ofisi ya Mufti wa Zanzibar imetoa msimamo thabiti, ikiwataka viongozi wote wa dini nchini kujitenga kikamilifu na siasa za vyama na badala yake waweke nguvu zao katika kuhubiri amani, umoja na uadilifu, hasa katika kipindi hiki muhimu cha kisiasa. Msimamo huo mzito ulitolewa na Katibu wa Mufti, Khalid Ali Mfaume, wakati wa kikao maalum kilichomkutanisha mgombea urais wa Zanzibar kupitia CCM, Dk. Hussein Ali Mwinyi, na viongozi wa madhehebu mbalimbali Kisiwani Pemba.
Bwana Mfaume alisisitiza kuwa misingi mikuu ya dini zote ulimwenguni ni kulea amani, kudumisha utulivu, na kusimamia haki, na hivyo ni kinyume na maadili kwa kiongozi wa kiroho kugeuka kuwa mshabiki au mwanaharakati wa chama cha kisiasa. Alionya kuwa jukumu lao la msingi ni kuwaunganisha Watanzania na si kuwagawa kwa misingi ya kiitikadi.
"Amani ya nchi yetu inajengwa na maneno na matendo yetu. Kila mmoja wetu, na hasa viongozi wa dini, ana wajibu wa kuwa mlinzi wa jirani yake katika kuhakikisha nchi inabaki salama," alisema Mfaume.
Katika kauli iliyozua mjadala, Katibu huyo alikwenda mbali zaidi na kusema kuwa ushiriki wa kiongozi wa dini katika maandamano ni haramu na ni ishara ya wazi kuwa mhusika ana changamoto binafsi katika imani yake. "Maandamano ni haramu katika dini. Unapomuona kiongozi wa dini anashiriki maandamano, tambua kuwa ana changamoto yake ya kiimani. Wajibu wetu ni kusimamia uadilifu na maadili mema, si kuingia mitaani," alifafanua.
Aidha, alikemea vikali tabia ya baadhi ya wanasiasa wanaotoa kauli za kichochezi zinazoweza kuhatarisha utulivu wa nchi. Aliwataka viongozi wenzake wa dini kutofumbia macho lugha za hatari na badala yake wasimame imara kuzipinga hadharani ili kulinda mshikamano wa taifa ambao umejengwa kwa gharama kubwa. Alimalizia kwa kusema, ingawa wakati mwingine viongozi wa dini hulaumiwa kwa kutozungumzia haki, ukweli ni kwamba "haki" yenyewe ni ajenda ya Mwenyezi Mungu ambayo wanapaswa kuisimamia daima.