Wakati Tanzania ikiwa imebakiza siku nne tu kuelekea zoezi muhimu la kidemokrasia la Uchaguzi Mkuu, viongozi wa juu wa dini kutoka Kanda ya Kati wamekutana jijini Dodoma na kutoa tamko zito lenye lengo moja: kulinda na kudumisha amani ya nchi. Katika mkutano huo wa pamoja, viongozi hao wamewahimiza Watanzania kujitokeza kwa wingi kupiga kura tarehe 29 Oktoba 2025, wakieleza kuwa huo ndio urithi wa thamani zaidi ambao taifa linapaswa kuulinda kwa gharama yoyote.
Wito huo mzito ulitolewa leo, Oktoba 25, 2025, wakati wa "Kongamano la Amani" lililowakutanisha viongozi wa madhehebu mbalimbali ya Kikristo na Kiislamu kutoka mikoa ya Dodoma na Singida. Kongamano hilo lilijikita katika kujadili historia ya chaguzi za taifa, wajibu wa kikatiba wa raia kushiriki, na juu ya yote, umuhimu wa utulivu katika kipindi hiki muhimu cha mpito wa kidemokrasia.
Akifungua mjadala kuhusu tunu ya amani, Mwenyekiti wa Baraza la Makanisa ya Kikristo Tanzania (CCT) Mkoa wa Dodoma, Askofu Joseph Mtolela wa Kanisa la Mennonite (KMT), alisema Tanzania imefanikiwa kubaki kuwa kitovu cha utulivu katika kipindi chote cha kampeni. Alisisitiza kuwa jukumu la kuhakikisha hali hiyo inadumu liko mikononi mwa kila mwananchi.
"Tuko kwenye mteremko wa mwisho kuelekea uchaguzi. Tumezunguka na kampeni zetu kwa utulivu mkubwa, na sasa tunahitaji kuonesha ukomavu huo siku ya kupiga kura," alisema Askofu Mtolela. "Ni lazima tutoke kwa wingi, tukimchagua kiongozi au chama kitakachohakikisha amani, usalama, na utulivu wa nchi yetu unaendelea. Amani hii ni zawadi kutoka kwa Mwenyezi Mungu, ni kipawa ambacho ndicho msingi wa maendeleo. Bila hiyo, hakuna kitakachofanyika, na tutaikimbia nchi yetu wenyewe."
Hofu kuhusu mmomonyoko wa maadili ilielezwa na Mwenyekiti wa Jumuiya ya Maridhiano Mkoa wa Dodoma, Askofu Evance Chande wa Kanisa la Karmel Assemblies of God. Alionya kuwa roho ya uzalendo miongoni mwa Watanzania imeanza kupungua.
"Kama viongozi wa kiroho, tuna wajibu wa kusimama imara. Kuna adui anayepambana usiku na mchana kuondoa amani yetu. Lazima tuamke, tushirikiane na vyombo vya dola, na kuwapa elimu ya uzalendo vijana wetu ambao mara nyingi hutumiwa vibaya na wenye nia ovu," alionya Askofu Chande.
Kwa upande wake, Sheikh wa Mkoa wa Singida, Issa Nassoro, alieleza kuwa changamoto kubwa haiko kwa viongozi wa juu, bali kwa baadhi ya wafuasi ambao hupoteza hofu ya Mungu na kuwa tayari kushiriki vitendo vya uvunjifu wa amani.
"Ni lazima tuwarudie waumini wetu, tuwaonye na kuwakemea. Vurugu kubwa huanza na jambo dogo, kama cheche ndogo inavyoweza kuunguza msitu mzima. Hatupaswi kuruhusu cheche hiyo iwake," alisema Sheikh Nassoro. Aliongeza kuwa kitendo cha kupiga kura ni sehemu ya ulinzi wa amani. "Amani ni bora kuliko riziki unayoitafuta. Jamii inayosusa uchaguzi inajinyima haki ya kupata viongozi inaowataka, na matokeo yake ni malalamiko na vurugu."
Naye Sheikh wa Mkoa wa Dodoma, Alhaji Dkt. Mustapha Rajabu, alitoa wito kwa raia kuwa watiifu kwa viongozi wao wa dini na serikali. "Maandamano pekee yaliyo halali tarehe 29 ni kwenda kituoni kupiga kura. Nendeni mkafanye uamuzi utakaoliletea taifa maendeleo. Tusipofanya hivyo, familia zetu zitaathirika," alisema.
Viongozi wengine, akiwemo Askofu Zephania Mkuyu (TAG) na Mshauri wa Mufti, Alhaji Ismail Dawood, walihitimisha kwa kusema suala la amani ni la kiroho na si la kisiasa, na kuwataka wananchi kutokuwa na hofu yoyote ya kujitokeza, bali wafanye hivyo kwa utulivu na amani.