Ofisi ya Mufti wa Zanzibar imetoa onyo kali kwa viongozi wa dini nchini, ikiwataka wajiepushe kikamilifu na siasa za vyama na badala yake wasimamie jukumu lao la msingi la kuhubiri amani na umoja. Akizungumza jana Kisiwani Pemba, Katibu wa Mufti, Khalid Ali Mfaume, alisisitiza kuwa jukwaa la kiongozi wa dini si la ushabiki wa kisiasa, bali ni la kulea misingi ya haki, uadilifu, na mshikamano ambayo ndiyo agenda kuu ya Mwenyezi Mungu.
Katika kikao kilichomhusisha mgombea urais wa Zanzibar kupitia CCM na viongozi wa madhehebu mbalimbali, Mfaume alitoa kauli iliyoshtua wengi, akisema kuwa maandamano ni haramu katika dini. Alisema kitendo cha kiongozi wa dini kushiriki katika maandamano ni ishara kuwa kiongozi huyo ana changamoto binafsi za kiimani na amepotoka kutoka kwenye wajibu wake mkuu.
"Amani ya nchi huvunjika kwa maneno na vitendo. Sisi kama viongozi wa dini, tuna wajibu wa kuwa walinzi wa amani hiyo. Hatupaswi kuwa chanzo cha mifarakano," alisema. "Wakati mwingine tunalaumiwa kwa kutozungumzia haki, lakini ukweli ni kwamba neno 'haki' lenyewe ni ajenda ya Mungu, na tunapaswa kuisimamia bila kuegemea upande wowote wa kisiasa."
Aidha, alikemea vikali kauli za baadhi ya wanasiasa ambazo zinaashiria uchochezi na uvunjifu wa amani. Aliwataka viongozi wenzake wa dini kutofumbia macho lugha za hatari na badala yake wasimame imara kuzikemea hadharani ili kulinda utulivu wa nchi, hasa katika kipindi hiki cha kuelekea uchaguzi.