Viongozi wa dini mbalimbali nchini wameungana kwa pamoja kuwahimiza Watanzania kuendeleza umoja na amani wakati nchi ikielekea Uchaguzi Mkuu wa leo. Wameondoa dhana potofu, wakisisitiza kuwa kulinda amani ni wajibu wa kila raia, na siyo ishara ya kujipendekeza au uchawa.
Wito huu umetolewa jijini Dar es Salaam wakati wa Kongamano la Amani la Kitaifa lenye kaulimbiu inayosisitiza: "Kupiga kura ni haki yetu, kulinda amani ni wajibu wetu."
Mufti na Sheikh Mkuu wa Tanzania, Dk. Abubakar Zubeir, amesema Watanzania hawapaswi kuichukulia amani kama jambo la kawaida, akisisitiza kuwa ni jukumu la wote. "Kuhakikisha nchi inabaki salama ni wajibu wa kila mmoja wetu. Tukifanya hivyo, tunaitendea haki nchi yetu na vizazi vijavyo," alisema Dk. Zubeir.
Kwa upande wa Kikristo, Katibu Mkuu wa Jumuiya ya Kikristo Tanzania (CCT), Mchungaji Dk. Moses Matonya, aliwahimiza wananchi kudumisha upendo, umoja na mshikamano, licha ya tofauti za kisiasa, kijamii na kidini. "Tuepuke maneno na vitendo vinavyoweza kuvuruga amani tuliyo nayo. Badala yake tushirikiane kulinda maadili na utu wa Mtanzania," alisisitiza Dk. Matonya.
Naye Naibu Katibu Mkuu wa Baraza la Maaskofu Katoliki Tanzania (TEC), Padre Chesco Msaga, alisema ni wajibu wa kila Mtanzania kuithamini nchi kama zawadi kutoka kwa Mungu.
Wito kwa Viongozi Watakaochaguliwa
Askofu Janeth Mabondo alitoa wito maalum kwa viongozi watakaochaguliwa baada ya uchaguzi. Aliwaasa kufanya maridhiano na kuepuka visasi vya kisiasa. Alikiri kuwa hakuna uchaguzi usiokuwa na changamoto, lakini viongozi wapya wanapaswa kuwa daraja la kuponya majeraha na kuimarisha umoja wa kitaifa.
Akizungumza kwa niaba ya Makamu wa Rais, Dk. Philip Mpango, Waziri wa Uwekezaji Profesa Kitila Mkumbo, alithibitisha kwamba serikali inaendelea kusimamia misingi imara ya amani na demokrasia. Profesa Mkumbo alitaja misingi minane (8) inayoongoza taifa kuelekea uchaguzi kuwa ni Utu, Haki, Usawa, Upendo, Umoja, Mshikamano, Demokrasia na Amani.
Alisisitiza kuwa viongozi wa dini wana mchango mkubwa katika kulinda amani, akifichua kuwa tafiti zinaonesha kundi hilo, pamoja na Rais na Jeshi la Wananchi wa Tanzania (JWTZ), ndilo linaloaminika zaidi na wananchi.