Mgombea urais wa Zanzibar kupitia Chama cha ADC, Hamad Rashid Mohammed, ametangaza kuwa endapo atachaguliwa, serikali yake itajikita katika kufufua na kurejesha hadhi ya kihistoria ya Zanzibar kama ' kisiwa cha marashi ya karafuu.' Amesema kipaumbele chake kikuu kitakuwa ni kuwekeza kwenye zao hilo, kuanzia kwenye uzalishaji hadi kuliongezea thamani ili liweze kukuza pato la taifa.
Akizungumza na waandishi wa habari visiwani humo, Hamad alieleza mkakati wake mahususi wa kulifanya Jeshi la Kujenga Uchumi (JKU) kuwa kitovu cha uzalishaji na usambazaji wa miche bora ya mikarafuu kwa wakulima wote. Alisema ingawa Zanzibar inajulikana duniani kwa karafuu, bado zao hilo halijapewa msukumo unaostahili kuliinua kiuchumi.
Pamoja na karafuu, mgombea huyo aliahidi kuleta mapinduzi katika sekta nyingine. Katika kilimo, alisema ataboresha kilimo cha mpunga ili kimnufaishe mkulima mdogo, na kubadilisha kilimo kwa ujumla kuwa biashara yenye faida kwa vijana. Kwenye uchumi wa buluu, aliahidi kuwezesha vijana kwa kuwapatia zana za kisasa za uvuvi wa bahari kuu, na kuunganisha hilo na ujenzi wa viwanda vya kuchakata mazao ya bahari ili kuunda ajira.
Kuhusu huduma za jamii, Hamad aliahidi kuboresha maslahi na mazingira ya kazi kwa walimu, kuimarisha miundombinu ya shule, na kusogeza huduma bora za afya karibu na wananchi mijini na vijijini. Aligusia pia umuhimu wa upatikanaji wa maji safi na salama, na akahakikisha kuwa wazee waliostaafu watapata stahiki na pensheni zao kwa wakati bila usumbufu.
Katika masuala ya kiuongozi, alisisitiza kuwa serikali yake itaheshimu Muungano wa Tanganyika na Zanzibar, huku akiahidi kushughulikia kasoro zilizopo kwa njia ya mazungumzo yenye maslahi kwa pande zote. Alionyesha imani yake kwa Tume ya Uchaguzi ya Zanzibar (ZEC) na kusisitiza umuhimu wa kuheshimu utawala wa sheria.
Alihitimisha kwa kuahidi kuendesha kampeni za kistaarabu, zenye hoja na zisizo na porojo, huku akiwasihi Wazanzibari wote kudumisha amani, kwani ndiyo msingi mkuu wa maendeleo yoyote.