Mgombea Urais wa Jamhuri ya Muungano wa Tanzania kupitia Chama Cha Mapinduzi (CCM), Dkt. Samia Suluhu Hassan, amesisitiza dhamira yake ya kuendelea kuimarisha sekta ya afya nchini, akiahidi uboreshaji zaidi wa huduma hizo katika miaka mitano ijayo, endapo atachaguliwa tena.
Akizungumza katika mkutano wa kampeni Moshi Mjini leo, Oktoba Mosi, 2025, Dkt. Samia alieleza vipaumbele vyake vya kiafya:
- Dawa na Vifaa Tiba: Kuendelea kuhakikisha utoshelevu wa dawa zote muhimu kwenye Vituo vya Afya na Hospitali, na kuongeza vifaa tiba vya kisasa katika vituo vyote nchini.
- Watumishi wa Afya: Kuongeza idadi ya watumishi wa afya ili kukidhi mahitaji ya utoaji huduma bora kwa wananchi.
Dkt. Samia alikumbusha mafanikio ya serikali ya awamu ya sita katika kuboresha upatikanaji wa dawa nchini, akisema wamefanikiwa kuongeza upatikanaji huo hadi kufikia asilimia 86. Aliahidi kuendeleza kazi hii ikiwa atapata ridhaa ya kuongoza tena katika Uchaguzi Mkuu wa Oktoba 29, mwaka huu.
Mapinduzi ya Afya Kilimanjaro
Akizungumzia Mkoa wa Kilimanjaro, Dkt. Samia alisisitiza maboresho makubwa yaliyofanyika katika Hospitali ya Rufaa ya Mawenzi. Kwa sasa, hospitali hiyo inatoa huduma muhimu ikiwemo matibabu kwa wagonjwa mahututi, huduma kwa watoto wanaozaliwa kabla ya muda (njiti), usafishaji wa figo, pamoja na upatikanaji wa vipimo vya kisasa.
Aidha, alikumbusha uzinduzi wa Jengo la Mama na Mtoto aliofanya katika kipindi chake cha kwanza, akieleza athari chanya ya uwekezaji huo:
"Uwepo wa jengo lile umewezesha kuongeza idadi ya wanawake wanaojifungulia kwenye hospitali mbalimbali tulizozijenga na akinamama wanaoitika kwenda hospitali kwa ajili ya huduma za uzazi na matibabu kwenye Mkoa huu imetoka 260,486 hadi 328,502."
Aliongeza kuwa jitihada hizo zimechangia kwa kiasi kikubwa kupunguza vifo vya akinamama wakati wa kujifungua, na akaahidi kuendeleza kazi hiyo kubwa ya kunusuru maisha ya Watanzania.