Sekta ya afya nchini Tanzania imepiga hatua kubwa katika miaka ya hivi karibuni, mafanikio ambayo sasa si tu yanaboresha maisha ya Watanzania bali pia yanaifanya nchi kuwa kivutio kwa matibabu kwa raia wa kigeni. Hayo yamebainishwa na Waziri Mkuu wa Jamhuri ya Muungano wa Tanzania, Mheshimiwa Kassim Majaliwa, alipokuwa akiwasilisha hotuba ya mapitio na mwelekeo wa kazi za serikali pamoja na makadirio ya mapato na matumizi ya Ofisi ya Waziri Mkuu na Ofisi ya Bunge kwa mwaka ujao wa fedha.
Akilihutubia Bunge mjini Dodoma, Waziri Mkuu alieleza kuwa maboresho makubwa yaliyofanywa na serikali, yakishirikiana na sekta binafsi, yamezaa matunda dhahiri. Mojawapo ya viashiria vikubwa vya mafanikio hayo ni ongezeko la wagonjwa kutoka nje ya nchi wanaokuja kutafuta huduma za matibabu Tanzania. Alibainisha kuwa hadi kufikia Februari 2025, jumla ya wagonjwa 7,843 kutoka mataifa mengine walipata huduma nchini, idadi iliyoongezeka kutoka wagonjwa 5,705 waliorekodiwa mwaka 2020. Hali hii inaashiria kuimarika kwa utalii wa tiba nchini.
Mafanikio haya yanatokana na uwekezaji mkubwa uliofanywa katika miundombinu na huduma. Idadi ya vituo vya kutolea huduma za afya imeongezeka kutoka 8,458 mwaka 2020 hadi kufikia 9,826 Februari 2025. Vilevile, hospitali zenye uwezo wa kutoa huduma za matibabu ya dharura zimeongezeka kwa kasi kubwa kutoka saba tu mwaka 2020 hadi kufikia 116 Februari 2025. Maboresho pia yameonekana kwenye huduma za mama na mtoto, ambapo vituo vya afya vyenye majengo maalum kwa ajili yao vimeongezeka kutoka 6,081 hadi 7,397 katika kipindi hicho.
Matokeo chanya zaidi ya maboresho haya yameonekana katika kupungua kwa viwango vya vifo. Waziri Mkuu alieleza kuwa vifo vinavyotokana na matatizo ya uzazi (vifo vya akina mama) vimepungua kwa kiwango kikubwa sana, kutoka vifo 556 kwa kila vizazi hai 100,000 mwaka 2020 hadi kufikia vifo 104 Februari 2025. Kadhalika, vifo vya watoto walio chini ya umri wa miaka mitano vimepungua kutoka vifo 67 (kwa kila vizazi hai 1,000) mwaka 2020 hadi 43 Februari 2025.
Zaidi ya hayo, Mheshimiwa Majaliwa alisisitiza kuwa upatikanaji wa huduma za kibingwa na ubingwa bobezi umeimarishwa na kusogezwa karibu na wananchi. Huduma hizo muhimu, ambazo awali zilipatikana zaidi katika hospitali za kanda, sasa zinatolewa pia katika hospitali za rufaa za mikoa. Alitaja baadhi ya huduma hizo kuwa ni pamoja na afya ya uzazi na magonjwa ya wanawake, afya ya watoto, magonjwa ya ndani, aina mbalimbali za upasuaji (ikiwemo mifupa na ajali), huduma za dharura, mionzi, ganzi na dawa za usingizi.
Ili kukamilisha picha ya mafanikio, Waziri Mkuu aliongeza kuwa hali ya upatikanaji wa dawa muhimu, vifaa tiba, vitendanishi vya kisasa na bidhaa nyingine za afya imeimarika kutoka wastani wa asilimia 73 mwaka 2020 hadi kufikia asilimia 89.3 Februari 2025, hatua muhimu katika kuhakikisha wananchi wanapata tiba stahiki kwa wakati.