Mgombea urais kupitia Chama Cha Mapinduzi (CCM), Dk. Samia Suluhu Hassan, ameendeleza kasi ya kampeni zake kwa kishindo mkoani Morogoro, ambapo ametoa ahadi nzito ya ujenzi wa barabara muhimu kwa kiwango cha lami, akilenga kutatua kero za muda mrefu za wananchi na kufungua fursa za kiuchumi katika ukanda huo muhimu kwa kilimo.
Akiwa katika mkutano wa hadhara uliofurika umati eneo la Ngerengere, ikiwa ni siku ya pili ya kampeni zake kuelekea uchaguzi mkuu wa Oktoba 29, 2025, Dk. Samia aliwahakikishia wananchi kuwa serikali yake itajenga barabara za Bigwa, Mvua hadi Kisaki pamoja na ile ya Ubena Zomozi hadi Ngerengere, ahadi iliyopokelewa kwa shangwe na nderemo.
Alisema, "Hii ni barabara muhimu sana kwa sababu ndiyo inayounganisha maeneo mbalimbali na makao makuu ya halmashauri ya wilaya. Ahadi yangu na ya CCM, kwa kuzingatia mahitaji yenu, ni kwamba tunakwenda kujenga barabara hizi."
Ahadi hiyo inakuja kama faraja kubwa kwa wakazi na viongozi wa eneo hilo, ikiwemo mgombea ubunge wa Jimbo la Morogoro Kusini-Mashariki, Hamis Taletale 'Babu Tale', ambaye amekuwa akiwasilisha kilio cha miundombinu hiyo kwa muda mrefu. Dk. Samia alikiri jitihada za Babu Tale na kuongeza kuwa ana dhamira ya dhati ya kuitekeleza ahadi hiyo, akitaja pia maslahi yake binafsi katika eneo hilo. "Mimi ni mkazi wa eneo hili, nina mashamba huku, hivyo barabara hii ni muhimu kwetu sote," alieleza Dk. Samia.
Akigusia hali ya ujenzi wa barabara ya Ubena-Zomozi (kilomita 11.6), alikiri kuwa umefikia asilimia 24 na kuahidi kwenda kuukamilisha. Aidha, mgombea huyo wa CCM alionesha kuguswa na changamoto za wakulima, akisema, "Nafahamu kuwa wakazi wengi hapa ni wakulima wazuri ingawa kuna kilio cha ardhi, tumekichukua na tunakwenda kukifanyia kazi."
Ahadi hizi za Morogoro zinajumuishwa kwenye orodha ya ahadi nyingine za kitaifa alizozitoa wakati wa uzinduzi wa kampeni zake jijini Dar es Salaam, ikiwemo kugharamia matibabu kwa wagonjwa wa figo na saratani, pindi atakapochaguliwa kuendelea kuongoza nchi.