Katika Jukwaa la kampeni za Chama Cha Mapinduzi (CCM) wilayani Ludewa, Mkoa wa Njombe, mgombea ubunge wa jimbo hilo, Joseph Kamonga, ameweka wazi kuwa uchumi wa wananchi umefungwa kutokana na ubovu wa miundombinu ya barabara, huku akiwasilisha ombi zito kwa mgombea mwenza wa urais, Balozi Dk. Emmanuel Nchimbi.
Akihutubia umati uliofurika katika Uwanja wa Halmashauri ya Ludewa mnamo Septemba 22, 2025, Kamonga alianza kwa kuishukuru serikali inayoongozwa na Dkt. Samia Suluhu Hassan kwa mafanikio makubwa yaliyopatikana ndani ya miaka mitano. Hata hivyo, alisisitiza kuwa barabara ndio kero kuu inayokwamisha fursa za kiuchumi kwa wananchi wa Ludewa. Alisema kukamilika kwa barabara muhimu kutakuwa mkombozi mkuu na ufunguo wa maendeleo ya kweli.
Kamonga alieleza kuwa ingawa serikali kupitia TANROADS imetenga kiasi cha Shilingi Bilioni 180 kwa ajili ya ujenzi wa barabara, bado kuna uhitaji mkubwa. Alitaja miradi muhimu kama Barabara ya Litoni–Lusitu inayojengwa kwa zege na ile inayoanzia Mkiui–Liganga–Madaba kama kipaumbele cha wananchi, akisisitiza kuwa zimeingizwa kwenye ilani ya CCM ya 2025-2030 na utekelezaji wake unatazamia kufungua wilaya hiyo kibiashara na kilimo.
Licha ya changamoto hiyo, Kamonga alimwaga sifa kwa serikali kwa mafanikio yaliyopatikana kwenye sekta nyingine. Katika sekta ya afya pekee, zaidi ya Shilingi Bilioni 27.7 zimewekezwa, zikiwezesha ujenzi wa vituo vya afya vinne na zahanati 22, huku nyingine tano zikiendelea kujengwa. Upande wa elimu, alitaja ujenzi wa shule saba mpya za sekondari, ikiwemo shule ya kifahari ya Ufundi ya Njombe, kama ushahidi wa mapinduzi ya kielimu wilayani humo. Aidha, aliipongeza serikali kwa kulipa fidia ya Shilingi Bilioni 19 kwa wananchi wa Liganga na kwa kutoa mbolea ya ruzuku iliyoongeza tija kwenye mavuno ya mahindi.
Akijibu hoja hizo, Balozi Dk. Nchimbi aliwahakikishia wananchi wa Ludewa kuwa serikali ya CCM imedhamiria kumaliza kero ya barabara. Alithibitisha kuwa ahadi hizo zipo kwenye ilani na akataja miradi mingine itakayotekelezwa ikiwemo ujenzi wa barabara ya Mkomang’ombe – Mchuchuma kwa kiwango cha zege, ujenzi wa madaraja muhimu kama Daraja la Kiwe, Igugu kwenye Mto Ruhuhu, na Daraja la Mawe, pamoja na barabara za Mawengi – Makonde, Lusitu – Madilu – Lugalala, na nyinginezo, akisema kura zao kwa CCM ndio itakayofungua milango ya utekelezaji wa miradi hiyo.